అనుకున్నంత ఈజీ కాదు... ఆ విషయం తెలిసినా?

చంద్రబాబు ఎవరిని నియోజకవర్గం నుంచి తప్పించాలని చూసినా రాజకీయంగా ఇబ్బందులు తప్పవు. అందుకే వారంతా ధీమాగా ఉన్నారు. తమకు తప్ప ఎవరికీ సీటు రాదన్న ఆలోచనతోనే వారు పార్టీలో యాక్టివ్ గా లేకపోయినా పరవాలేదన్న ధోరణితో వ్యవహరిస్తున్నారు. చంద్రబాబు చెప్పినట్లు చివరి నిమిషంలో యాక్టివ్ అయ్యేవారికి టిక్కెట్లు దొరకవని చెప్పడంపై కూడా పెద్దగా నేతలు టెన్షన్ పడటం లేదు.

ఇప్పటికే అనేక నియోజకవర్గాల్లో నేతలు తమ సొంత వర్గాన్ని పెంచుకున్నారు. గత రెండేళ్లుగా పార్టీలో యాక్టివ్ లేకపోయినా తన వర్గం వారిని మాత్రం వారు దూరం చేసుకోలేదు. ఇప్పుడు అనంతపురం నుంచి శ్రీకాకుళం జిల్లా వరకూ అదే పరిస్థిితి నెలకొంది. గత ఎన్నికల్లో పోటీ చేసి ఓటమి పాలయిన నేతలు ఇప్పుడిప్పుడే యాక్టివ్ అవుతున్నారు. కర్నూలు జిల్లాలో డోన్ నియోజకవర్గానికి ఇన్ ఛార్జిగా నియమించిన ధర్మవరపు సుబ్బారెడ్డిని కేఈ కుటుంబం వ్యతిరేకిస్తుంది. ఆయనకు సహకరించే పరిస్థితి లేదని చెబుతుంది.

అదే సమయంలో ధర్మవరం నియోజకవర్గంలో వరదాపురం సూరి తిరిగి టీడీపీలోకి వద్దామని ప్రయత్నిస్తున్నారు. కానీ పరిటాల శ్రీరామ్ అక్కడ పాతుకుపోయారు. దీంతో సూరిని దూరం చేసుకుంటే ప్రధానంగా టీడీపీ ఓటు బ్యాంకుకే గండి పడనుంది. ఈ నేపథ్యంలో చంద్రబాబు అభ్యర్థులను మారుస్తారన్నది ఉత్తమాటేనన్న కామెంట్స్ పార్టీలోనే విన్పిస్తున్నాయి. ఒకవేళ అధికారంలోకి వస్తే పదవులు ఇస్తామని, ఈసారి టీడీపీ గెలుపునకు సహకరించాలని చెప్పినా వినే పరిస్థిితి లేదు. మరి చంద్రబాబు కు ఈసారి ఎన్నికల్లో అభ్యర్థుల ఎంపిక కత్తిమీద సామే అవుతుందని చెప్పకతప్పదు.