దుర్గమ్మ దర్శనం.... ప్రతి రోజూ ప్రత్యేక చీర
దుర్గగుడి శరన్నవరాత్రులు సందర్భంగా తొమ్మిది రోజులు పాటు అమ్మవారికి రకరకాలుగా నైవేద్యాన్ని సమర్పించడం ఆనవాయితీగా వస్తుంది
దుర్గగుడి శరన్నవరాత్రులు సందర్భంగా తొమ్మిది రోజులు పాటు అమ్మవారికి వివిధ రకాలుగా నైవేద్యాన్ని సమర్పించడం ఆనవాయితీగా వస్తుంది. ఒక్కొక్క రోజు ఒక్కొక్క నైవేద్యం పెట్టి దుర్గమ్మ ఆశీర్వాదాన్ని పొందుతారు. ఈ నెల 15వ తేదీ నుంచి ఇంద్రకీలాద్రిపై శరన్నవరాత్రులు ప్రారంభం కానున్నాయి. ఏ రోజు ఏ నైవైద్యం పెట్టాలనేది ముందుగానే నిర్ణయించి దానిని ప్రత్యేకంగా తయారు చేయిస్తారు. ప్రతి ఏటా ఇదే పద్ధతిలో అమ్మవారికి నైవేద్యం సమర్పిస్తుంటారు. రుచిగా, శుచిగా నైవేద్యాన్ని దుర్గమ్మకు సమర్పించి భక్తి శ్రద్ధలతో పూజలు చేస్తారు. ఏ రోజు ఏ నైవేద్యాన్ని అమ్మవారికి పెడతారన్నది ఇప్పుడు తెలుసుకుందాం.
ఒక్కోరోజు
అలాగే నవరాత్రుల్లో ప్రతి రోజూ ఒక రంగు చీర కడతారు. తొమ్మిది అలంకారాలకు తొమ్మిది రకాలు చీరలో అమ్మవారు భక్తులకు దర్శనమిస్తారు. దుర్గమ్మను దర్శించుకునే వారికి ఈ నవరాత్రుల్లో ఇవి ప్రత్యేకం. ప్రతి ఏడాది శరన్నవరాత్రుల సందర్భంగా చీరతో పాటు నైవేద్యం కూడా ప్రత్యేకంగానే ఉంటుంది. ఇందుకోసం ప్రత్యేకంగా తెప్పించిన చీరలను అమ్మవారికి ఈ తొమ్మిది రోజులు అలంకరిస్తారు. ఒక్కోరోజు ఒక్కోరంగు చీరతో అమ్మవారిని దర్శించుకునేందుకు భక్తులు బారులు తీరనున్నారు. లక్షలాది మంది భక్తులు ఇంద్రకీలాద్రికి చేరుకునే అవకాశముండటంతో అధికారులు అందుకు తగిన ఏర్పాట్లు చేస్తున్నారు.
తొలి రోజు: బంగారు రంగు చీర, కట్టె పొంగలి, చలిమిడి, వడపప్పు, పాయసం నైవేద్యం
రెండో రోజు : లేత గులాబీ రంగు చీర, పులిహోర నైవేద్యం
మూడో రోజు : కాషాయం లేదా నారింజరంగు చీర, కొబ్బరి అన్నం, కొబ్బరి పాయసం నైవేద్యం
నాలుగో రోజు : గంధపురంగు లేదా పసుపురంగు చీర, పరమాణ్ణం, దద్దోజనం, గారెలు నైవేద్యం
ఐదో రోజు : కుంకుమ రంగు చీర, నైవేద్యంగా దద్దోజనం, క్షీరాన్నం గా సమర్పిస్తారు.
ఆరో రోజు : గులాబీ రంగు చీర, చక్కెర పొంగలి, క్షీరాన్నాన్ని నైవైద్యంగా సమర్పిస్తారు
ఏడో రోజు : తెలుపురంగు చీర, కేసరి, పరమాన్నం, దద్దోజనం నైవేద్యం
ఎనిమిదో రోజు : ఎరుపు రంగు చీర, కదంబం, శాకాన్నం నైవేద్యం
తొమ్మిదో రోజు : ముదురు ఎరుపురంగు చీర, చక్కెర పొంగలి నైవేద్యం
పదో రోజు : ఆకుపచ్చ రంగు చీర, పులిహోర, లడ్డూ, బూరెలు, గారెలు, అన్నం నైవేద్యం