Helicopter : హెలికాప్టర్ గంటకు అద్దె ఎంతో తెలుసా? గుండె జారి.. గల్లంతవుతుందిగా

బీహార్ లో ఎన్డీఏ కూటమిలోని పార్టీలతో పాటు మహాఘట్ బంధన్ కు చెందిన నేతలు కూడా హెలికాప్టర్లను ముందుగా బుక్ చేసుకుంటున్నారు. ఇంకా సీట్ల కేటాయింపులో స్పష్టత లేకపోయినప్పటికీ హెలికాప్టర్లు మళ్లీ దొరకవేమోనని పార్టీల నేతలు ముందుగానే అడ్వాన్స్ ఇచ్చిబుక్ చేసుకుంటున్నారు. పాట్నా తో పాటు వివిధ విమానాశ్రయాల్లో హెలికాప్టర్ల మెయిన్ టెయిన్స్ కోసం కూడా ఏర్పాట్లు చేసుకుంటున్నాయి. అయితే ఎన్నికల సమయం కావడంతో హెలికాప్టర్ అద్దె ధర మామూలుగా లేదట. 2020లో జరిగిన బీహార్ అసెంబ్లీ ఎన్నికల్లో ఎన్టీఏ, మహా ఘట్ బంధన్ కు చెందిన పార్టీలు ఆరు హెలికాప్టర్లు మాత్రమే వినియోగించాయంటున్నారు. అయితే ఇప్పుడు మాత్రం రెండు కూటములు దాదాపు ఇరవైకి పైగా హెలికాప్టర్లను వినియోగించే అవకాశముంది.

ఈ మేరకు ముందుగా బుక్ చేసుకున్న పార్టీ నేతలు తమ పార్టీకి చెందిన అగ్రనేతల కోసం అడ్వాన్స్ లు కూడా చెల్లిస్తున్నారు. హెలికాప్టర్ అద్దె కూడా పార్టీ ఎన్నికల వ్యయంలో పడుతున్నప్పటికీ పెద్దగా లెక్క చేయకుండా ముందుగానే బుక్ చేసుకుంటున్నారు. దీంతో హెలికాప్టర్ల అద్దె మరింత పెరిగిపోయింది. ఎన్డీఏ కూటమి దాదాపు పదమూడు హెలికాప్టర్లను బుక్ చేుకుంది. మహాఘట్ బంధన్ కు చెందిన పార్టీలు ఐదు హెలికాప్టర్లు ఇప్పటి వరకూ బుక్ చేసుకున్నారట. అయితే డబుల్ ఇంజిన్ హెలికాప్టర్ల అద్దె గంటకు నాలుగు లక్షల రూపాయల వరకూ ఉండగా, సింగిల్ ఇంజిన్ హెలికాప్టర్ అద్దె రెండు లక్షలు పలుకుతుందట. వీటికి తోడు అదనంగా జీఎస్టీని చెల్లించాల్సి ఉంటుంది. అయినా లెక్క చేయకుండా పార్టీలు ఎక్కువ ధర చెల్లించి హెలికాప్టర్లను అద్దెకు తీసుకునేందుకు అడ్వాన్స్ లు ఇచ్చేసినట్లు సమాచారం.