వీలైనంత త్వరగా మీ పిల్లల ఆధార్ అప్డేట్ చేయండి

పిల్లల ఆధార్ ను అప్డేట్ చేశారా? లేదంటే వెంటనే అప్డేట్ చేసేయండి. లేదంటే వారికి చిక్కులు తప్పవు. దేశవ్యాప్తంగా పాఠశాల విద్యార్థుల ఆధార్ వివరాలను తక్షణమే అప్‌డేట్ చేయాలని భారత విశిష్ట గుర్తింపు ప్రాధికార సంస్థ.. యూఐడీఏఐ అన్ని రాష్ట్ర ప్రభుత్వాలను కోరింది. విద్యార్థులు భవిష్యత్తులో నీట్, జేఈఈ, సీయూఈటీ వంటి జాతీయ స్థాయి ప్రవేశ పరీక్షలకు హాజరయ్యేటప్పుడు, ప్రభుత్వ పథకాలను పొందేటప్పుడు ఎలాంటి ఇబ్బందులు ఎదుర్కోకుండా ఉండాలంటే ఈ ప్రక్రియ అత్యంత కీలకమని స్పష్టం చేసింది. యూఐడీఏఐ చీఫ్ భువనేశ్ కుమార్ అన్ని రాష్ట్రాలు, కేంద్ర పాలిత ప్రాంతాల ప్రధాన కార్యదర్శులకు అందుకు సంబంధించి లేఖ రాశారు. పిల్లలు పెరిగే కొద్దీ వారి వేలిముద్రలు, కనుపాపల వంటి బయోమెట్రిక్ వివరాలలో మార్పులు వస్తాయని, అందుకే వాటిని కచ్చితమైన సమయాల్లో అప్‌డేట్ చేయడం తప్పనిసరి అని వివరించారు. ప్రతి విద్యార్థికి 5 నుంచి 7 ఏళ్ల మధ్య ఒకసారి, ఆ తర్వాత 15 నుంచి 17 ఏళ్ల మధ్య మరోసారి బయోమెట్రిక్స్‌ను తప్పనిసరిగా అప్‌డేట్ చేయాలని యూఐడీఏఐ సూచించింది.