62 ఏళ్ల వయసులో ఐసెట్ రాసి.. ర్యాంకులు కొట్టి

డాక్టర్​ కావాల్సిన కుమారుడు, తోడుగా ఉన్న భార్య నెలల వ్యవధిలోనే మరణించినా ఆయన వాటన్నింటిని అధిగమించి ఐసెట్​లో రెండు సార్లు ర్యాంకు సాధించారు. ఇటీవల విడుదలైన ఐసెట్​ ఫలితాల్లో 178 వ ర్యాంకు తెచ్చుకున్నారు. చిన్నచిన్న కష్టాలకే తీవ్ర ఒత్తిడికి గురవుతున్న నేటి యువతకు తన విజయం ద్వారా ఆదిలాబాద్​కు చెందిన రావుల సూర్యనారాయణ స్ఫూర్తినిచ్చారు.

టీచర్స్‌కాలనీకి చెందిన రావుల సూర్యనారాయణ ఎల్‌ఐసీలో అధికారి. భార్య ప్రభుత్వ ఉపాధ్యాయురాలు, పెద్ద కుమారుడు శశాంక్‌ కేంద్ర ప్రభుత్వ ఉద్యోగి, చిన్నకుమారుడు శరణ్‌ మెడిసిన్​ సీట్ సాధించాడు. 2020లో సూర్యనారాయణ వాలంటరీ రిటైర్మెంట్ తీసుకున్నారు. కొంతకాలానికే చిన్న కుమారుడు అనారోగ్యంతో చనిపోయాడు. కరోనాతో భార్య మరణించారు. ఈ బాధను దిగమింగిన ఆయనకు పరీక్షల్లో విఫలమయ్యామని యువత ఆత్మహత్యలు చేసుకుంటున్నారనే వార్తలు కలచి వేశాయి. భావితరాలకు ప్రాణాల విలువను తెలియచెప్పాలని నిర్ణయించుకున్నారు. అందుకోసం వయోపరిమితి లేని ఐసెట్​ పరీక్ష రాస్తున్నారు. తొలి ప్రయత్నంలో 1,828 ర్యాంకు తెచ్చుకున్నారు. మలి ప్రయత్నంలో ఈ సారి ఏకంగా 178 ర్యాంకు సాధించారు.