కాబూల్ పరిసర ప్రాంతంలో సంభవించిన 5.8 తీవ్రత భూకంపంలో ఎనిమిది మంది ప్రాణాలు కోల్పోయారు. మృతులు ఇటీవల ఇరాన్ నుంచి తిరిగి వచ్చిన శరణార్థి కుటుంబానికి చెందినవారని రక్షణ చర్యల్లో పాల్గొన్న వారు తెలిపారు. ఆ కుటుంబంలో ఒక్క మూడేళ్ల బాలుడు మాత్రమే ప్రాణాలతో బయటపడ్డాడు. అతడికి గాయాలై కాబూల్ ఆసుపత్రిలో చికిత్స అందిస్తున్నారు. అఫ్ఘానిస్తాన్ ప్రభుత్వ ఉపప్రవక్త హమ్దుల్లా ఫిత్రత్ శనివారం భూకంప మృతుల సంఖ్యను 12గా ఉందని చెప్పారు. మరో నలుగురికి గాయాలయ్యాయని చెప్పారు. కాబూల్, పంజ్షీర్, లోగర్, నంగర్హార్, లఘ్మాన్, నూరిస్తాన్ ప్రాంతాల్లో ఐదు ఇళ్లు పూర్తిగా ధ్వంసమై, మరో 33 ఇళ్లు తీవ్రంగా దెబ్బతిన్నాయని వెల్లడించారు. మొత్తం 40 కుటుంబాలు ప్రభావితమయ్యాయి.
విపత్తు నిర్వహణ సంస్థ మాత్రం...
అయితే అఫ్ఘానిస్తాన్ విపత్తు నిర్వహణ సంస్థ మృతుల సంఖ్యను తొమ్మిదిగా ప్రకటించింది. ఈ తేడా ఎందుకు వచ్చిందో స్పష్టత రాలేదు. ఇరాన్, పాకిస్తాన్ దేశాలు 2023లో విదేశీయులపై కఠిన చర్యలు చేపట్టడంతో లక్షలాది అఫ్ఘాన్ శరణార్థులు తిరిగి తమ దేశానికి చేరుకున్నారు. కాబూల్ సమీపంలోని ఈ కుటుంబం కూడా 15 రోజుల క్రితమే చేరుకుని నియాజీ ఇంటి పక్కన ఉన్న భూమిపై గుడారం వేసుకుని ఉండేది.కాబూల్ తూర్పు అంచున ఉన్న ఇట్టెఫాక్ గ్రామంలో నియాజీ ఇంటి పక్కనే ఆ కుటుంబం గుడారం వేసుకుంది. నియాజీ ఇల్లు ఎత్తైన ప్రదేశంలో ఉండగా, ఆ గుడారం ఒక గోడకు ఆనుకుని ఉండేది.గత కొన్ని రోజులుగా కురిసిన భారీ వర్షాలతో నేల బురదగా మారింది. ఈ పరిస్థితిలో భూకంపం రావడంతో ఆ గోడ నేరుగా గుడారం మీద కూలిపోయింది.
మృతదేహాలను బయటకు తీసి...
శనివారం ఉదయం అక్కడ ఇటుకలు, మట్టి మాత్రమే కనిపించాయి. పక్కనే దుప్పట్లు, వంట సామగ్రి, వ్యక్తిగత వస్తువులు రాశిగా పెట్టారు.“మూడునిమిషాల పాటు వారి కేకలు వినిపించాయి. కానీ మేమేం చేయలేకపోయాం. ముగ్గురితో అయ్యే పని కాదు” అని నియాజీ అన్నారు.పొరుగువారు వచ్చి చేతులతో, పళ్లెంలతో మట్టి తొలగించారు. సమీప తాలిబాన్ పోలీస్ చెక్పోస్ట్కు సమాచారం ఇవ్వడంతో రక్షణ సిబ్బంది, అంబులెన్సులు చేరుకున్నాయి.ఆరాష్ అనే బాలుడిని గాయాలతో బయటకు తీసి ఆసుపత్రికి తరలించారు. ఆరోగ్యశాఖ ప్రతినిధి షరాఫత్ జమాన్ శనివారం బాలుడిని పరామర్శించి తలకు తీవ్రమైన గాయం ఉందని తెలిపారు.మిగతా కుటుంబ సభ్యులు, తల్లిదండ్రులు, 12 నుంచి 23 ఏళ్ల మధ్య వయస్సున్న నలుగురు కుమార్తెలు, ఇద్దరు కుమారులు—ప్రాణాలు కోల్పోయారు. రక్షణ సిబ్బంది మృతదేహాలను మాత్రమే బయటకు తీశారు.శుక్రవారం భూకంపం సంభవించడానికి అరగంట ముందే ఆ కుటుంబాన్ని తన ఇంటి అతిథి గదిలో రాత్రి గడపాలని నియాజీ ఆహ్వానించారని చెప్పారు. “వారు నాతో రాలేదు” అని విచారంగా అన్నారు.
వరుస భూకంపాలతో...
ఈ భూకంపం హిందూకుష్ పర్వత శ్రేణిలో కేంద్రంగా నమోదైంది. ఉత్తర నగరం కుందుజ్కు సుమారు 150 కి.మీ. తూర్పున, కాబూల్కు దాదాపు 290 కి.మీ. ఈశాన్య దిశలో ఇది సంభవించినట్లు యూరో-మెడిటరేనియన్ భూకంప కేంద్రం, అమెరికా భూకంప పరిశోధనా సంస్థ వెల్లడించాయి. భూకంపాలకు అత్యంత సున్నితమైన ప్రాంతంలో అఫ్ఘానిస్తాన్ ఉంది. ఇటీవలి సంవత్సరాల్లో వేలాది మంది ఈ విపత్తుల్లో ప్రాణాలు కోల్పోయారు. గత ఆగస్టులో తూర్పు అఫ్ఘానిస్తాన్లో సంభవించిన 6.0 తీవ్రత భూకంపంలో 2,200 మందికి పైగా మరణించారు. కునార్ ప్రాంతంలో ఎక్కువ నష్టం జరిగింది. నవంబరులో ఉత్తర ప్రాంతమైన సమంగాన్లో 6.3 తీవ్రత భూకంపంతో కనీసం 27 మంది మృతి చెందగా, 950 మందికి పైగా గాయపడ్డారు. మజార్-ఇ-షరీఫ్ నగరంలోని ప్రసిద్ధ బ్లూ మసీదు, ఖుల్మ్లోని బాగ్-ఇ-జహాన్ నామా మహల్ కూడా దెబ్బతిన్నాయి. 2023 అక్టోబర్ 7న పశ్చిమ అఫ్ఘానిస్తాన్లో సంభవించిన 6.3 తీవ్రత భూకంపం, ఆపై వచ్చిన తీవ్ర ప్రకంపనలతో వేలాది మంది ప్రాణాలు కోల్పోయారు.