Pak - Afghan War : పాక్ , ఆఫ్ఘాన్ మధ్య చర్చలు.. నెల రోజులకు పైగా కొనసాగుతున్న యుద్ధం

ఉరుమ్చీలో ఉన్న ఆఫ్ఘాన్ ప్రతినిధి బృందంలో ఐదుగురు సభ్యులున్నారని ఒక అధికారి తెలిపారు. వారిలో ఇద్దరు విదేశాంగ శాఖకు, ఒక్కొక్కరు రక్షణ, అంతర్గత వ్యవహారాలు, గూఢచారి సంస్థకు చెందినవారని వివరించారు. పాకిస్తాన్ వర్గాల ప్రకారం ఈ చర్చలు రెండు దేశాల ప్రజలకు ఉపశమనంగా భావిస్తున్నారు. ఇవి పలు రోజులు కొనసాగే అవకాశముందని, ఇది శాంతి ప్రక్రియకు ఆరంభమని తెలిపారు. తూర్పు ఆఫ్ఘాన్ ప్రావిన్స్ కునార్ పోలీసు ప్రతినిధి ఫరీద్ దేహ్కాన్ ప్రకారం, బుధవారం రాత్రి పాకిస్తాన్ మోర్టార్ లుపేల్చడంతో ఇద్దరు పౌరులు మృతి చెందగా, నలుగురు పిల్లలు సహా ఆరుగురు గాయపడ్డారు. రెండు గంటల తరువాత కూడా కాల్పులు కొనసాగుతున్నాయని చెప్పారు. ఈ ఆరోపణలపై పాకిస్తాన్ సైన్యం వెంటనే స్పందించలేదు.నేడు కూడా చర్చలు...ఇరు దేశాలు చైనా మధ్యవర్తిత్వాన్ని అంగీకరించిన తర్వాతే ఈ తాజా చర్చలు ప్రారంభమయ్యాయని వర్గాలు తెలిపాయి. గురువారం కూడా చర్చలు కొనసాగనున్నాయి. ఫిబ్రవరి చివరి నుంచి చర్చలు పునఃప్రారంభించాలని చైనా పిలుపునిస్తూ వస్తోంది. చైనా ప్రత్యేక ప్రతినిధి యుయే షియావోయాంగ్ గత నెల కాబూల్ సందర్శన తర్వాత పాకిస్తాన్ ప్రతినిధి మహమ్మద్ సాదిక్‌ను కలిశారు. పాకిస్తాన్ ఆరోపణల ప్రకారం, తమ దేశంలో దాడులు చేస్తున్న మిలిటెంట్లకు ఆఫ్ఘానిస్తాన్ ఆశ్రయం ఇస్తోందని చెబుతోంది. ముఖ్యంగా పాకిస్తాన్ తాలిబాన్‌కు మద్దతు ఇస్తోందని ఆరోపిస్తోంది. అయితే కాబూల్ ఈ ఆరోపణలను ఖండించింది.పాకిస్తాన్ మాజీ ప్రత్యేక ప్రతినిధి ఆసిఫ్ దుర్రానీ మాట్లాడుతూ, ఈ చర్చలు అధికారికంగా ధృవీకరించబడితే గణనీయమైన పురోగతి సాధ్యమని ఆశాభావం వ్యక్తం చేశారు.

“ఈ చర్చల ఫలితంగా ఒప్పందం కుదిరితే, ఆఫ్ఘాన్ భూభాగం పాకిస్తాన్‌పై దాడులకు వినియోగించకుండా ఉండేలా నిర్ధారణ వ్యవస్థ కీలకం అవుతుంది” అని చెప్పారు.ఫిబ్రవరి నుంచి సాగుతున్న ఈ ఘర్షణలు దశాబ్దాల తర్వాత అత్యంత తీవ్రంగా మారాయి. ఘర్షణలు ప్రారంభమైన కొద్దిసేపటికే పాకిస్తాన్ ‘బహిరంగ యుద్ధం’ పరిస్థితి నెలకొన్నట్లు ప్రకటించింది. సరిహద్దు దాటే కాల్పులు, కాబూల్ సహా ఆఫ్ఘాన్ ప్రాంతాల్లో వైమానిక దాడులు చోటుచేసుకున్నాయి.గత నెల కాబూల్‌లో మాదకద్రవ్య చికిత్స కేంద్రంపై పాకిస్తాన్ వైమానిక దాడి జరిపిందని, 400 మందికి పైగా మరణించారని ఆఫ్ఘానిస్తాన్ తెలిపింది. ఈ సంఖ్యను స్వతంత్రంగా ధృవీకరించలేకపోయారు. పాకిస్తాన్ ఈ ఆరోపణను ఖండిస్తూ, ఆయుధ నిల్వ కేంద్రాన్నే లక్ష్యంగా చేసుకున్నామని తెలిపింది.ఆ సమయంలో పాకిస్తాన్ సమాచార మంత్రి అత్తౌల్లా తరార్ మాట్లాడుతూ, “మేము ఆస్పత్రులు లక్ష్యంగా చేయలేదు. తీవ్రవాద మౌలిక వసతులనే దాడి చేశాం” అని చెప్పారు.

రంజాన్ ముగింపు సందర్భంగా ఈద్ అల్-ఫిత్ర్ పర్వదినం సమయంలో తాత్కాలిక విరమణకు ఇరు దేశాలు అంగీకరించాయి. కానీ ఫిబ్రవరి, మార్చిలో జరిగిన భారీ ఘర్షణలతో పోలిస్తే తక్కువ స్థాయిలో మళ్లీ ఘర్షణలు చోటుచేసుకున్నాయి.అంతర్జాతీయ సమాజం ఈ పరిస్థితిపై ఆందోళన వ్యక్తం చేసింది. అల్‌ఖైదా, ఇస్లామిక్ స్టేట్ వంటి తీవ్రవాద సంస్థలు ఈ ప్రాంతంలో మళ్లీ చురుకుగా మారే అవకాశం ఉందని ఆందోళన వ్యక్తమవుతోంది.అక్టోబరులో ఖతార్ మధ్యవర్తిత్వంతో కుదిరిన కాల్పుల విరమణ కూడా ఈ తాజా ఘర్షణలతో దెబ్బతిన్నది. సౌదీ అరేబియాలో ఇటీవల జరిగిన చర్చలు ఫలితం లేకుండా ముగిశాయి. నవంబరులో ఇస్తాంబుల్‌లో జరిగిన శాంతి చర్చలు కూడా స్థిరమైన ఒప్పందానికి దారి తీయలేదు. చైనాలో జరుగుతున్న ఈ తాజా చర్చల్లో పాకిస్తాన్, ఆఫ్ఘానిస్తాన్ తరఫున ఎవరు ప్రాతినిధ్యం వహిస్తున్నారన్నది ఇంకా స్పష్టంగా తెలియరాలేదు.