Hyderabad : హైదరాబాద్ - విజయవాడ హైవే పై ఎన్ని వాహనాలున్నాయో తెలుసా?

పంతంగి టోల్ ప్లాజా నుంచి కీసర టోల్ ప్లాజా వద్ద వాహనాల రద్దీ ఎక్కువగా ఉందని నిర్వాహకులు తెలిపారు. పోలీసులు అక్కడ విధులను నిర్వహిస్తూ ట్రాఫిక్ ను క్రమబద్ధీకరిస్తున్నప్పటికీ వాహనాలు మాత్రం వేగంగా వెళ్లాలని ముందుకు రావడంతో ట్రాఫిక్ సమస్యలు తలెత్తుతున్నాయి. టోల్ ప్లాజా వద్ద ట్రాఫిక్ ను వేగంగా పంపేందుకు విజయవాడ వైపు వెళ్లే టోల్ బూత్ లను ఎక్కువ సంఖ్యలో తెరిచారు. హైదరాబాద్ కు వచ్చే టోల్ బూత్ లను తగ్గించి అటు వైపు వెళ్లే బూత్ ల సంఖ్య పెంచారు.

నిన్న దాదాపు విజయవాడ వైపు 70 వేల కుపైగా వాహనాలు వెళ్లాయని టోల్ నిర్వాహకులు చెబుతున్నారు. నేడు ఆదివారం కావడంతో రద్దీ మరింత ఎక్కువగా ఉంటుందన్న అభిప్రాయంతో జాతీయ రహదారిపై ట్రాఫిక్ ను ఎప్పటికప్పుడు క్లియర్ చేయడానికి పోలీసులు ప్రయత్నిస్తున్నారు. మరొకవైపు ఆర్టీసీ, ప్రయివేటు బస్సులు, రైళ్లు సంక్రాంతికి వెళ్లే ప్రయాణికులతో రద్దీగా మారిపోవడం, టిక్కెట్లు దొరకకపోవడంతో ఎక్కువ మంది సొంత వాహనాలతో బయలుదేరారు. ఈసారి ఆదివారం నుంచి ఆదివారం వరకూ సంక్రాంతి సెలవులు రావడంతో ఎక్కువ మంది సొంతూళ్లకు బయలుదేరి వెళుతున్నారు.