Montha Cyclone : మొంథా తుపాను పరిహారం కథ ముగిసినట్లేగా?

అయితే మూడు నెలలు గడుస్తున్నప్పటికీ రైతులకు పరిహారం మాత్రం అందలేదు. మొంథా తుపాను పరిహారాన్ని ప్రభుత్వం మర్చిపోయినట్లే కనపడుతుంది. కేంద్ర ప్రభుత్వం నుంచి కూడా నిధులు విడుదల కాలేదు. మొంథా తుపాను దెబ్బకు వరి, పత్తి, వేరుశెనగ, మొక్కజొన్న, మిర్చి వంటి పంటలతో పాటు అరటి, బొప్పాయి, కంద వంటి పంటలను సాగు చేసిన రైతులు తీవ్రంగా నష్టపోయారు. ప్రభుత్వ నష్టం అంచనాలే వ్యవసాయానికి 829 కోట్ల రూపాయలుగా అంచనా వేసింది. ప్రభుత్వ అంచనాలే ఇలా ఉంటే అంతకు మించి నష్టం జరిగి ఉంటుంది. కానీ పరిహారం కింద రైతులకు పైసా కూడా అందలేదు. దీంతో అన్నదాతలు కూటమి ప్రభుత్వం తీరుపై అసంతృప్తి వ్యక్తం చేస్తున్నారు.

ప్రభుత్వం కూడా రైతులకు పూర్తి పరిహారాన్ని అందిచడం కష్టమే. రాజధాని కోసం, విగ్రహాల కోసం వేల కోట్ల రూపాయలు వెచ్చిస్తున్న ప్రభుత్వం రైతులను ఆదుకునేందుకు పైసా కూడా విదల్చకపోవడం ఏంటని సోషల్ మీడియాలో విమర్శలు తీవ్రంగా వినిపిస్తున్నాయి. కేంద్ర ప్రభుత్వం కూడా అనేకరకాలుగా ఏపీకిసాయం చేస్తుండటంతో తుపాను బాధితులకు పరిహారం అందించడంలో మాత్రం కరుణ చూపించలేదన్న విమర్శలు వినిపిస్తున్నాయి. ఇక ప్రభుత్వం మొంథా తుపాను పరిహారం దాదాపు మర్చిపోయినట్లే.మరొక తుపాను వచ్చినా రైతులు తమ పంటను కాపాడుకోవాలంటే ముందుగా వారే బీమా చేసుకోవడం ఉత్తమం. అంతే తప్ప ప్రభుత్వాల మీద ఆధారపడటం సరికాదన్న కామెంట్స్ కూడా వినిపిస్తున్నాయి. అన్నదాతల ఆక్రందనను పట్టించుకోకపోవడం లేదన్న ఆవేదన వ్యక్తమవుతున్నా పాలకులు మాత్రం పట్టించుకున్న పాపాన పోవడం లేదు.