Medaram : భక్తజనం పులకించింది.. వనదేవతలను చూసి తరించారు

రెండేళ్లకు ఒకసారి జరిగే మేడారం జాతరకు తెలంగాణ, మహారాష్ట్ర, ఛత్తీస్ గఢ్, ఆంధ్రప్రదేశ్ రాష్ట్రాల నుంచి పెద్ద సంఖ్యలో భక్తులు తరలి వచ్చి వనదేవతలకు మొక్కులు చెల్లించుకుంటారు. ఈసారి నాలుగు రోజుల ఈ జాతరకు మూడు కోట్ల మంది భక్తులు వస్తారని అంచనా వేసిన ప్రభుత్వం అందుకు తగినట్లు ఏర్పాట్లు చేసింది. పోలీసులు విస్తృత బందోబస్తు ఏర్పాటు చేశారు. సమ్మక్క తల్లిని గద్దెపైకి తీసుకు వచ్చే దృశ్యాన్ని చూసేందుకు లక్షలాది మంది తరలి వచ్చారు. చాలా మంది ఎదురుకోళ్లు సమర్పించుకుంటున్నారు. చిలుకల గుట్ట నుంచి మేడారం వరకూ భక్తులు బారులు తీరారు.

దీంతో పాటు అనేక మంది ప్రజాప్రతినిధులు కూడా మేడారం చేరుకుని తమ మొక్కులు చెల్లించుకన్నారు. ఈరోజు గవర్నర్ జిష్ణుదేవ్ వర్మ మేడారం జాతరను సందర్శించనున్నారు. అమ్మవార్లకు మొక్కులు చెల్లించుకోనున్నారు. ఇప్పటికే నలుగురు వనదేవతలు గద్దెలపైకి చేరడంతో గొర్రెలను బలి ఇచ్చి వేలాదిమంది భక్తులు మొక్కులు చెల్లించుకుంటున్నారు. మేడారం దారులన్నీ వాహనాలతో నిండిపోయాయి. అయితే ఎక్కడా ట్రాఫిక్ రద్దీ తలెత్తకుండా అవసరమైన అన్ని చర్యలను పోలీసులు తీసుకున్నారు. దర్శనానికి గంటల సమయం పడుతుంది. ఈరోజు, రేపు మరింత మంది భక్తులు తరలి వస్తారని అంచనా వేస్తున్నారు. అందుకు తగినట్లుగా ఏర్పాట్లు చేస్తున్నారు.