సత్తా ఉంది.. పృథ్వీ షా సంచలన ఇన్నింగ్స్

టీ20 ముంబై లీగ్ లో పృథ్వీ షా సంచలన ఇన్నింగ్స్ ఆడాడు. నార్త్ ముంబై పాంథర్స్ జట్టుకు సారథ్యం వహిస్తున్న షా, కేవలం 34 బంతుల్లోనే 75 పరుగులు చేశాడు. తనలో సత్తా ఏ మాత్రం తగ్గలేదని షా నిరూపించుకున్నాడు. ఈ ఇన్నింగ్స్‌తో సూర్యకుమార్ యాదవ్ నేతృత్వంలోని ట్రయంఫ్ నైట్స్ జట్టుపై పాంథర్స్‌ విజయాన్ని అందుకుంది.

నార్త్ ముంబై పాంథర్స్ జట్టుకు కెప్టెన్‌గా బాధ్యతలు చేపట్టిన 25 ఏళ్ల పృథ్వీ షా ఈ సీజన్‌లో తన తొలి అర్ధశతకాన్ని నమోదు చేశాడు. 220కి పైగా స్ట్రైక్ రేట్‌తో పరుగులు సాధించాడు. షా దూకుడుగా ఆడటంతో పాంథర్స్ జట్టు నిర్ణీత ఓవర్లలో 6 వికెట్ల నష్టానికి 207 పరుగుల భారీ స్కోరును నమోదు చేసింది. ఒకప్పుడు భారత క్రికెట్‌లో అత్యంత ప్రతిభావంతుడైన యువ బ్యాట్స్‌మెన్‌గా పేరుపొందిన షా, అనేక కారణాల వలన భారత జట్టులో స్థానం కోల్పోయాడు. ఈ ఏడాది కనీసం ఒక్క ఐపీఎల్ జట్టులో కూడా స్థానం సంపాదించలేకపోయాడు. పృథ్వీ షా తిరిగి ఫామ్‌లోకి రావడం క్రికెట్ అభిమానుల్లో ఆనందాన్ని నింపింది.