మధ్యాహ్న భోజన పథకం ద్వారా 11.46 కోట్లను మాయం చేసిన ప్రధానోపాధ్యాయుడు

ఉత్తరప్రదేశ్ రాష్ట్రంలోని ఫిరోజాబాద్‌లోని ప్రాథమిక విద్యా విభాగానికి చెందిన ఒక పాఠశాల ప్రిన్సిపాల్ మధ్యాహ్న భోజనం (MDM) పథకంలో భాగంగా వచ్చిన నిధులలో ఏకంగా ₹ 11.46 కోట్లను మాయం చేసిన ఆరోపణలపై కేసు నమోదు చేసినట్లు పోలీసులు తెలిపారు. సదరు ఉపాధ్యాయుడు నాన్-గవర్నమెంట్ ఆర్గనైజేషన్ (NGO)ని నకిలీ పత్రాలను ఉపయోగించి ఏర్పాటు చేసాడు. బ్యాంకుల అధికారులు, ఇతర సిబ్బంది సహాయంతో మధ్యాహ్న భోజన పథకానికి సంబంధించిన డబ్బులతో ₹ 11.46 కోట్లు సొంత ప్రయోజనాల కోసం ఉపయోగించాడని ఆగ్రా సూపరింటెండెంట్ ఆఫ్ పోలీస్ (విజిలెన్స్) తెలిపారు. "ఫిరోజాబాద్ జిల్లాకు చెందిన ప్రాథమిక విద్యాశాఖలో ఉన్న ఉపాధ్యాయుడు చంద్రకాంత్ శర్మపై ఈ అవినీతి కేసు నమోదైంది. షికోహాబాద్ నివాసి. ఫిరోజాబాద్ జిల్లా తుండ్లలోని జాజుపూర్‌లోని ప్రాథమిక పాఠశాలలో ప్రిన్సిపాల్‌గా పనిచేస్తున్నాడు." అని అలోక్ శర్మ, సూపరింటెండెంట్ ఆఫ్ పోలీస్ (విజిలెన్స్) తెలిపారు.