ఫ్యాక్ట్ చెక్: జూబ్లీహిల్స్ ఉపఎన్నికల్లో కాంగ్రెస్ అభ్యర్థి కి, కవిత మద్దతు పలుకుతున్నారంటూ వైరల్ అయిన వీడియో పాతది
Old Video of K Kavitha Falsely Linked to Congress Candidate Naveen Yadav in Jubilee Hills Bypoll
K Kavitha
తెలంగాణలోని జూబ్లీ హిల్స్ అసెంబ్లీ నియోజకవర్గానికి నవంబర్ 11, 2025న ఉప ఎన్నికలు జరగనున్నాయి. 2025 జూన్లో భారత రాష్ట్ర సమితి (BRS) ఎమ్మెల్యే మాగంటి గోపీనాథ్ మరణం కారణంగా ఈ ఉప ఎన్నిక అనివార్యం అయింది.
అధికార కాంగ్రెస్ పార్టీ పనితీరుపై ప్రజాభిప్రాయ సేకరణగా పరిగణించబడుతున్న ఈ ఎన్నికల్లో BRS పార్టీ గోపీనాథ్ భార్య మాగంటి సునీతను నామినేట్ చేయగా, భారతీయ జనతా పార్టీ (BJP) లంకాల దీపక్ రెడ్డి, కాంగ్రెస్ పార్టీ నవీన్ యాదవ్లను పోటీలో నిలిపాయి. ఈ త్రిముఖ పోటీ ఫలితాన్ని హైదరాబాద్, తెలంగాణ రాజకీయాలలో ఓ కీలకమైనదిగా భావించవచ్చు.
మాజీ ఎంపీ కె. కవిత కాంగ్రెస్ జూబ్లీహిల్స్ ఎమ్మెల్యే అభ్యర్థి నవీన్ యాదవ్తో కలిసి నడుస్తున్నట్లు చూపించే వీడియో సోషల్ మీడియా ప్లాట్ఫామ్లలో వైరల్ అవుతోంది. జూబ్లీహిల్స్ ఉప ఎన్నికల్లో ఆమె కాంగ్రెస్ అభ్యర్థికి మద్దతు ఇస్తున్నారనే వాదనతో ఆ వీడియోను షేర్ చేస్తున్నారు.
మహా న్యూస్ ఛానల్ “Kalvakuntla Kavita garu will be in favour of Naveen Yadav |Viral.” అనే క్యాప్షన్ తో వీడియోను షేర్ చేశారు.
నవీన్ యాదవ్ అభిమాని ఖాతా అని చెప్పుకునే X ఖాతాలో కల్వకుంట్ల కవిత నవీన్ యాదవ్ కు అనుకూలంగా ఉన్నారనే క్యాప్షన్తో వీడియోను షేర్ చేశారు. "#NaveenYadav #kavitha #TeamNY #Congress #JubileeHills #TelanganaByElection #VoteForChange” అనే హ్యాష్ ట్యాగ్స్ తో పోస్టులు పెట్టారు
వైరల్ క్లెయిమ్ కు సంబంధించిన స్క్రీన్ షాట్ ను ఇక్కడ చూడొచ్చు.
ఫ్యాక్ట్ చెక్:
వైరల్ అవుతున్న వాదన నిజం కాదు. ఆ వీడియో పాతది, జూబ్లీ హిల్స్ ఉప ఎన్నికలకు సంబంధించినది కాదు.
వైరల్ వీడియో నుండి కీఫ్రేమ్లను సంగ్రహించి, వాటిని రివర్స్ ఇమేజ్ సెర్చ్ చేసి శోధించగా, తెలంగాణ జాగృతి అధ్యక్షుడు జె.రాము యాదవ్ జూన్ 1, 2025న చేసిన పోస్టును మేము కనుగొన్నాం.
మే 30, 2025న అదే ఫేస్బుక్ యూజర్ ప్రచురించిన మరో వీడియోను కూడా మేము కనుగొన్నాము, అందులో కె.కవిత ఇతరులతో కలిసి కారులో ప్రయాణిస్తున్నట్లు చూడొచ్చు. వైరల్ వీడియోలో ఉన్న చీరనే ఆమె ధరించి ఉండటం చూడవచ్చు.
మరింత పరిశోధనలో, కల్వకుంట్ల కవిత ఆఫీస్ అనే X ఖాతా ప్రచురించిన మరొక పోస్ట్ మాకు లభించింది. ఆమె మంచిర్యాలలో తన వద్ద పనిచేస్తున్న ఉద్యోగి వివాహానికి హాజరైనట్లు పేర్కొంది. “మంచిర్యాలలో జరిగిన తన కార్యాలయ ఉద్యోగి జిల్లు ప్రవీణ్ యాదవ్ వివాహానికి హాజరై వధూవరులను ఆశీర్వదించిన ఎమ్మెల్సీ శ్రీమతి @RaoKavitha” అంటూ పోస్టులు పెట్టారు.
కె. కవిత ఇటీవల చేసిన ఏవైనా ప్రకటనల కోసం మేము వెతికినప్పుడు, అక్టోబర్ 16, 2025న V6 న్యూస్ తెలుగు ప్రచురించిన వీడియో మాకు కనిపించింది. ఈ వీడియోలో ఆమె నాలుగు నెలల పాటు "జాగృతి జనమ్ బాట" అనే రాష్ట్రవ్యాప్త పర్యటనను ప్రకటించిన విలేకరుల సమావేశం ఉంది. అక్టోబర్ 25, 2025 నుండి ఫిబ్రవరి 13, 2026 వరకు జరగనున్న ఈ పర్యటనలో కవిత తెలంగాణలోని 32 జిల్లాల్లో ప్రతి జిల్లాలో రెండు రోజులు గడుపుతారు. అదే విలేకరుల సమావేశంలో, జూబ్లీ హిల్స్ ఉప ఎన్నికలపై స్పందించారు. ఆ ప్రకటనను 2.41 నిమిషాల వద్ద చూడవచ్చు.
మే 31, 2025న కవిత మంచిర్యాల జిల్లాను సందర్శించినట్లు చూపించే SLN న్యూస్ అనే యూట్యూబ్ ఛానెల్ లో అప్లోడ్ చేసిన మరో వీడియో కూడా మాకు లభించింది. వైరల్ వీడియోలో కనిపించే అదే చీరను ఆమె ధరించి ఉన్నట్లు మనం చూడవచ్చు.
జూబ్లీ హిల్స్ ఉప ఎన్నికలో మాజీ ఎంపీ కవిత కాంగ్రెస్ జూబ్లీ హిల్స్ అభ్యర్థి నవీన్ యాదవ్కు మద్దతు ఇస్తున్నారనే వాదనతో వైరల్ అవుతున్న వీడియో పాతది. వైరల్ అవుతున్న వాదన నిజం కాదు.
Claim :
Claimed By : Social media users
Fact Check : Unknown