ఫ్యాక్ట్ చెక్: 16 ఏళ్ల బాలికను ఆమె ఇష్టానికి వ్యతిరేకంగా 75 ఏళ్ల ముస్లిం వ్యక్తి వివాహం చేసుకున్నాడంటూ వైరల్ అవుతున్న వీడియో నిజమైనది కాదు

మైనర్‌ బాలికను వివాహం చేసుకుని, ఆమెతో సంసారం చేస్తే బాల్య వివాహ చట్టం–2006, పోక్సో చట్టం–2012 (సవరణ చట్టం–2019) ప్రకారం శిక్ష తప్పదు. మైనర్‌ బాలికను వివాహం చేసుకున్న వరుడికి బాల్య వివాహ నిషేధ చట్టం–2006లోని సెక్షన్‌ 9 ప్రకారం రెండేళ్ల జైలు శిక్ష, రూ.­లక్ష జరిమానా, లేదా రెండూ కలిపి విధించవచ్చు. బాల్య వివాహంతో 18 ఏళ్లలోపు బాలికతో సంసారం చేస్తే అత్యాచారం కేసుగా నమోదు చేసి పోక్సో సవరణ చట్టం–2019 సెక్షన్‌ 4(జీ) ప్ర­కా­రం పదేళ్లకు తక్కువ కాకుండా జైలు శిక్ష, జరిమానా, జీవిత ఖైదు విధించే అవకాశం ఉంది. 16 ఏళ్ల లోపు బాలికను వివాహం చేసుకుని సంసారం చేస్తే అత్యాచారం కేసులో పోక్సో సవరణ చట్టం–2019 సెక్షన్‌ 4(జీజీ) ప్రకారం ఇరవై సంవత్సరాలకంటే తక్కువ కాకుండా జైలు శిక్ష, జరిమానా, జీవిత ఖైదు విధిస్తారు.

2030 నాటికి బాల్య వివాహాలను నిర్మూలించడానికి కేంద్రం బాల్య వివాహాలకు వ్యతిరేకంగా ప్రచారం నిర్వహిస్తూ ఉంది. కేంద్ర ప్రభుత్వం బాల్య వివాహాల నియంత్రణకు ప్రత్యేకంగా ‘బాల్‌ వివాహ్‌ ముక్తు భారత్‌’ కార్యక్రమాన్ని చేపట్టింది. బాల్య వివాహాలు జరిగినట్టు తెలిస్తే 1098, 181, 100 నంబర్లకు ఫోన్‌చేసి ఫిర్యాదు చేయవచ్చు. సమీపంలోని అంగన్‌వాడీ కేంద్రానికి సమాచారం ఇవ్వొచ్చు.

75 ఏళ్ల ముస్లిం వ్యక్తి 16 ఏళ్ల అమ్మాయిని ఆమె ఇష్టానికి విరుద్ధంగా వివాహం చేసుకున్నాడని వీడియో వైరల్ అవుతూ ఉంది. వరుడు ఆమెను లాగడానికి ప్రయత్నిస్తుండగా వధువు కన్నీళ్లు పెట్టుకుంటున్న దృశ్యాలు ఈ ఫుటేజీలో ఉన్నాయి. ఆమె బెంగాలీలో "నేను వెళ్లాలనుకోవడం లేదు. నేను ఈ ముసలి వ్యక్తితో వెళ్లాలనుకోవడం లేదు" అని అరుస్తున్నట్లు వినవచ్చు.

వైరల్ పోస్టులకు సంబంధించిన స్క్రీన్ షాట్స్ ను ఇక్కడ చూడొచ్చు

ఫ్యాక్ట్ చెకింగ్:

వైరల్ అవుతున్న వాదనలో ఎలాంటి నిజం లేదు. బలవంతపు వివాహం మీద నటీనటులతో చిత్రీకరించిన వీడియోను మతపరమైన కోణంలో షేర్ చేశారు.


మేము వీడియోను కీఫ్రేమ్‌లుగా విభజించి గూగుల్ రివర్స్ ఇమేజ్ సెర్చ్‌ను నిర్వహించాము. ఈ వీడియోను ‘వెడ్డింగ్ స్టూడియో’ అనే ఫేస్‌బుక్ పేజీలో అప్లోడ్ చేశారని గుర్తించాం.

ఈ ఖాతా బయోలో స్క్రిప్టెడ్ వీడియోలను వినోద ప్రయోజనాల కోసం తీసుకుని వచ్చినట్లు తెలిపారు. ఈ పేజీలో ప్రధానంగా వివాహాల సమయంలో వధూవరులు లేదా అసాధారణ పరిస్థితులు తలెత్తినట్లు చూడొచ్చు. వైరల్ వీడియోను వారి వీడియో లైబ్రరీలో మేము కనుగొన్నాము. నిడివి ఎక్కువ ఉన్న వీడియోను ఇక్కడ చూడొచ్చు.

మా తదుపరి పరిశోధనలో, జనవరి 3న పోస్ట్ చేయబడిన ‘AN Media 1’ అనే YouTube ఛానెల్‌లో వైరల్ వీడియోకు సంబంధించిన పొడవైన వెర్షన్‌ను మేము కనుగొన్నాము. ఈ వీడియోలోని నటీనటులు ఇతర వీడియోలలో కనిపించారు.

కాబట్టి, నటీనటులతో సృష్టించిన వీడియోను నిజమైనదిగా భావించి షేర్ చేస్తున్నారు. వైరల్ అవుతున్న వాదనలో ఎలాంటి నిజం లేదు.