ఫ్యాక్ట్ చెక్: వైరల్ ఫోటోలో ఉన్నది ఝాన్సీ లక్ష్మీ బాయి అని చెప్పడానికి సాక్ష్యాలు లేవు

1857-58లో మొదటి స్వాతంత్ర్య సంగ్రామానికి నాయకురాలు, 'ఝాన్సీ కి రాణి'గా ప్రసిద్ధి చెందిన రాణి లక్ష్మీ బాయి శౌర్యానికి పర్యాయపదంగా నిలిచారు. బ్రిటిష్ సైన్యం 1858లో ఝాన్సీని ముట్టడించింది. లక్ష్మీబాయి తన సైన్యంతో బ్రిటిష్ సేనలకు వ్యతిరేకంగా భీకర పోరాటం చేశారు. అసమాన ధైర్యసాహసాలను ప్రదర్శించి బ్రిటిష్వారి వెన్నులో వణుకు పుట్టించారు. నడుముకు తన దత్తపుత్రుడుని కట్టుకుని శత్రువులపై పోరాటం చేశారు. రెండు వారాల హోరాహోరీ యుద్ధం అనంతరం బ్రిటిష్ సైన్యం ఝాన్సీ రాజ్యాన్ని కైవసం చేసుకుంది. శత్రు మూకల తాకిడి ఎక్కువవ్వడంతో 50 అడుగుల కోట గోడ దూకి శత్రువుకు చిక్కకుండా తప్పించుకుంది. గ్వాలియర్ చేరుకుని స్వతంత్ర పోరాటంలో తన సహచరులైన నానా సాహెబ్ పీష్వా తదితరులను కలుసుకుంది. శత్రువులు అక్కడికీ రావడంతో ఆమె వారికి చిక్కకూడదని రణరంగం నుంచి తీవ్రగాయాలతో బాబా గంగదాస్ ఆశ్రమం చేరుకుంది. బ్రిటిష్ వారికి తన శవం కూడా చిక్కకూడదని స్వామీజీతో చెప్పి ప్రాణాలు వదిలింది.