Ys Jagan : చంద్రబాబు చెప్పేవన్నీ అబద్ధాలే.. ఇంత పచ్చిమోసమా?

సూపర్ సిక్స్ అంటూ ప్రజలను నమ్మించి అధికారంలోకి వచ్చిన చంద్రబాబు నాయుడు తర్వాత వాటి ఊసు మర్చిపోయారని వైఎస్ జగన్ అన్నారు. బడ్జెట్ లో నిరుద్యోగ భృతి గురించి ప్రస్తావన కూడా లేదన్నారు. బడ్జెట్ లో సూపర్ సిక్స్ అరకొర కేటాయింపులు చేశారన్నారు. తొమ్మిది నెలల్లోనే నాలుగున్నర లక్షల ఉద్యోగాలు ఇచ్చామని గవర్నర్ ప్రసంగంలో చెప్పారని, అయితే గవర్నర్ చేత అబద్ధాలు చెప్పించారని అన్నారు. ఆర్థిక సర్వేలోనూ 27 లక్షల ఉద్యోగాలు ఇచ్చేశామని పేర్కొనడం ఇంతకంటే దారుణం ఉంటుందా? అని ప్రశ్నించారు. ఇంత దారుణంగా నిరుద్యోగులను మోసం చేశారని, మూడు వేల రూపాయల నిరుద్యోగ భృతి ఇవ్వకుండా ఉపాధి అవకాశాలు కల్పించారని ఎలా చెబుతారని ఆయన ప్రశ్నించారు.

వైసీపీ హయాంలో కేవలం నాలుగు నెలల కాలంలోనే 1.30 వేల ఉద్యోగాలు ఇచ్చామని, అవి ప్రభుత్వ ఉద్యోగాలను ఇచ్చామని తెలిపారు. అలాగే రెండున్నర లక్షల మందిని వాలంటీర్లుగా నియమించామని చెప్పారు. ఆప్కాస్ ద్వారా మరో 90 లక్షల మందికి ఉద్యోగాలు కల్పించామని జగన్ అన్నారు. ఆర్టీసీ విలీనం ద్వారా వేలమంది ఉద్యోగులను ఊరట కల్పించామని చెప్పారు. ఐదేళ్లలో వైసీపీ ప్రభుత్వ ఉద్యోగాలే 6.31 లక్షల మందికి ఇచ్చామని తెలిపారు. 18 నుంచి అరవై ఏళ్ల లోపు ఉన్న ప్రతి మహిళకు ఏడాదికి పద్దెనిమిదివేలు ఇస్తామని అన్నారని, దాని ఊసే లేదని వైఎస్ జగన్ అన్నారు. ప్రతిమహిళకు చంద్రబాబు ఇప్పటి వరకూ 36 వేలు బాకీ ఉన్నారన్నారు. ఉచిత బస్సు పథకాన్ని కూడా అమలు చేయడం లేదన్నారు.