Breaking : మరో జాబితా విడుదల.. 27 స్థానాల్లో అభ్యర్థుల మార్పు

తాడేపల్లి క్యాంప్ కార్యాలయంలో తొలుత పార్టీ పెద్దలు సిట్టింగ్ ఎమ్మెల్యేలతో మాట్లాడుతున్నట్లు తెలిసింది. సజ్జల రామకృష్ణారెడ్డి, విజయసాయిరెడ్డి, అయోధ్య రామిరెడ్డితో పాటు బొత్స సత్యనారాయణ, మిధున్ రెడ్డిలు సిట్టింగ్ ఎమ్మెల్యేలతో సమావేశమై ఏ పరిస్థితుల్లో నియోజకవర్గాలను మారుస్తుందీ వివరిస్తున్నారు. ఆ తర్వాతనే జగన్ తో సమావేశానికి వీరు పంపుతున్నారు. ముందుగానే అభ్యర్థులను ఖరారు చేసి నేరుగా జనంలోకి వెళ్లేందుకు వైసీపీ అధినేత జగన్ ప్లాన్ చేస్తున్నారు. సోషల్ ఇంజినీరింగ్ లో భాగంగా టిక్కెట్ల కేటాయింపు జరుగుతుంది.

తొలి విడత జాబితాలో పదకొండు మంది సిట్టింగ్ ఎమ్మెల్యేల సీట్లు మార్చేశారు. వీరిలో కొందరికి స్థాన చలనం కలిగించగా, కొందరికి సీట్లు ఇవ్వలేమని చెప్పారు. ఇందులో మంత్రులు కూడా ఉన్నారు. అలాగే సీట్లు దక్కని వారికి వచ్చే ఎన్నికల్లో అధికారంలోకి వచ్చిన వెంటనే ఎమ్మెల్సీ లేదా రాజ్యసభ పదవి ఇస్తామని చెబుతుండటం విశేషం. ఎవరినీ వదులుకోనని, గెలుపే లక్ష్యంగా మార్పులు చేర్పులు తప్పవని, పార్టీ పరిస్థితిని అర్థం చేసుకుని సహకరించాలని జగన్ స్వయంగా కోరుతున్నట్లు తెలిసింది. బీసీలకు ఎక్కువ ప్రాధాన్యత ఇచ్చేలా జగన్ ఎక్కువగా అభ్యర్థులను ఎంపిక చేస్తున్నట్లు కనపడుతుంది. రెండో జాబితాను మంత్రి బొత్స సత్యనారాయణ, పార్టీ ప్రధాన కార్యదర్శి సజ్జల రామకృష్ణారెడ్డి విడుదల చేశారు.