లవ్ స్టోరీకి ఎండ్ కార్డు ఎలా పడుతుందో?

పవన్ కల్యాణ్ ప్రస్తుతం బీజేపీతో ప్రేమాయణం కొనసాగిస్తున్నారు. అంటే మిత్రపక్షంగా వ్యవహరిస్తున్నారన్నమాట. ఆ లవ్ ను కట్ చేసుకుని రావాలంటే పవన్ కు కష్టమే. ఎందుకంటే ఇన్ని సార్లు ప్రేమ.. బ్రేకప్ లను జనం అంగీకరించరు. అందుకే బీజేపీతోనే లవ్ ను కంటిన్యూ చేస్తూ టీడీపీతో అనుబంధాన్ని కొనసాగించాలి. అది సాధ్యమెలా? అన్నదే ప్రశ్న. పవన్ కల్యాణ్ కు బీజేపీతో తెగదెంపులు చేసుకోవాలని లేదు. అలాగని దానితో కలసి ఉంటే బూడిద తప్ప ఏమీ మిగలదు.

టీడీపీతో కలవాలని ఉంది. కానీ బీజేపీతో కలసి ప్రయాణం సాగించాలన్నది జనసేన అభిమతంగా ఉంది. బీజేపీ మాత్రం టీడీపీతో పొత్తు అనేది ఉండకూడదని భావిస్తుంది. చంద్రబాబును మరోసారి నమ్మి మోసపోరాదన్నది బీజేపీ నేతల అభిప్రాయం. జనసేనతోనే కలసి వచ్చే ఎన్నికల్లో కాకపోయినా ఎప్పటికైనా ఏపీ సీఎం పీఠాన్ని స్వాధీనం చేసుకోవాలన్నది ఆ పార్టీ ఉద్దేశ్యం. కానీ పవన్ కల్యాణ్ కు వచ్చే ఎన్నికల్లోనే పీఠాన్ని అధిరోహించాలని భావిస్తున్నారు.

ఇప్పటికే పార్టీ పెట్టి ఎనిమిదేళ్లవుతుంది. పార్టీని నడపటం అంత సులువు కాదు. అందుకే ఆయన అధికారాన్ని కోరుకుంటున్నారు. అధికారం దక్కాలంటే టీడీపీ అవసరం ఉంది. అలాగని పొత్తులతో వెంపర్లాడుతున్నట్లు కన్పించకూడదు. చంద్రబాబు ఆయనంతట ఆయనే పొత్తుల కోసం వచ్చేలా చూడాలి. ఇదీ జనసేన అధినేత పవన్ కల్యాణ్ అభిమతం. బీజేపీ మాత్రం టీడీపీతో పొత్తుకు ససేమిరా అంటుంది. మరి ఏపీ పొలిటికల్ పార్టీల లవ్ స్టోరీలో ఎండ్ కార్డు ఎలా పడుతుందన్నది ఆసక్తికరంగా మారింది.