Bhadrachalam: భద్రాచలంలో కన్నుల పండువగా సీతారాముల కల్యాణం

ఈ సందర్భంగా శ్రీరామ నామస్మరణతో మిథిలా స్టేడియంతో పాటు, భద్రాద్రి పురవీధులు మార్మోగాయి. అభిజిత్ మూహుర్తాన అర్చకులు.. సీతారాముల శిరస్సులపై జీలకర్ర బెల్లం ఉంచారు. సీతమ్మకు మాంగళ్యధారణ చేశారు. సీతారాములను వధూవరులుగా చూసి భక్తులు తరించారు. సీతారాముల కల్యాణాన్ని కనులారా వీక్షించడానికి రెండు తెలుగు రాష్ట్రాల నుంచి పెద్ద సంఖ్యలో భక్తులు తరలివచ్చారు. ముందు భక్తుల కోలాహలం, మంగళవాద్యాలు, కోలాట నృత్యాల నడుమ ఉత్సవమూర్తులను ఊరేగింపుగా మిథిలా ప్రాంగణానికి తీసుకువచ్చారు. స్టేడియంలోని కల్యాణ పీఠంపై ఉత్సవమూర్తులను ఉంచి సీతారాముల కల్యాణ మహోత్సవ విశిష్టతను భక్తులకు వేద పండితులు వివరించారు.

వేలాది మంది వచ్చిన భక్తుల కోసం లడ్డూల కోసం తొమ్మిది ప్రాంతాల్లో ఎనభై ప్రత్యేక కౌంటర్లను ఏర్పాటు చేశారు. మూడు లక్షల లడ్డూలతో పాటు ఐదు లక్షల తలంబ్రాలను సిద్ధం చేశారు. వేద పండితుల మంత్రోచ్ఛారణల మధ్య అత్యంత వైభవంగా సీతారాముల కల్యాణాన్ని కనులారా వీక్షించేందుకు పెద్ద యెత్తున ఏర్పాట్లు చేశారు. అలాగే భద్రాచలంలో జరుగుతున్న సీతారామ కల్యాణాన్ని లైవ్ లో లక్షలాది మంది తిలకించి తరించారు. సీతారాముల కల్యాణానికి వచ్చిన భక్తులందరికీ ప్రసాదాలను ఉచితంగా అందచేసిన అర్చక స్వాములు..వారికి తీర్థ ప్రసాదాలను అందచేశారు. రేపు శ్రీరాముడి పట్టాభిషేకం జరగనుంది.