బీఆర్ఎస్ ఆవిర్భావ వేడుకల్లో పాల్గొన్న ఆ హీరోను గుర్తుపట్టారా..?
ఈ సమయంలో ఓ హీరో కూడా బీఆర్ఎస్ పార్టీకి మద్దతు తెలుపుతూ కనిపించారు.
దసరా పర్వదినం సందర్భంగా తెలంగాణ ముఖ్యమంత్రి కేసీఆర్ జాతీయ పార్టీని ప్రకటించారు. భారత్ రాష్ట్ర సమితి (బీఆర్ఎస్) పేరుతో పార్టీని అనౌన్స్ చేశారు. టీఆర్ఎస్ ఇకపై బీఆర్ఎస్ గా కొనసాగుతుందని ఆయన చెప్పారు. తెలంగాణ భవన్ లో జరిగిన టీఆర్ఎస్ పార్టీ సర్వసభ్య సమావేశంలో ఆయన ఈ ప్రకటన చేశారు. కేంద్రంలోని బీజేపీ ప్రభుత్వం అన్ని రంగాల్లో విఫలమయిందని... మన దేశం బంగ్లాదేశ్ కంటే వెనుకబడటం ఏమిటని ఆయన ప్రశ్నించారు. దేశ ప్రజల శ్రేయస్సు కోసమే బీఆర్ఎస్ పార్టీని ఏర్పాటు చేస్తున్నామని.. రైతు సంక్షేమమే బీఆర్ఎస్ పార్టీ ప్రధాన అజెండా అని తెలిపారు. తాను దేశంలో అనేక ప్రాంతాలు తిరిగినప్పుడు... టీఆర్ఎస్ ను తెలంగాణకే పరిమితం చేస్తే ఎలాగని చాలా మంది తనను ప్రశ్నించారని కేసీఆర్ చెప్పారు. బీఆర్ఎస్ తొలి కార్యక్షేత్రాలు కర్ణాటక, మహారాష్ట్ర అని తెలిపారు.
సీఎం కేసీఆర్ మంచి విజన్ ఉన్న నాయకుడని.. బీఆర్ఎస్ పార్టీ జాతీయ స్థాయిలో విజయవంతం కావాలని కోరుకుంటున్నానని కర్ణాటక మాజీ సీఎం, జేడీయూ నేత హెచ్ డీ కుమారస్వామి ఆకాంక్షించారు. తెలంగాణ రాష్ట్ర ప్రభుత్వం అమలు చేస్తున్న సంక్షేమ పథకాలు బాగున్నాయని.. దేశమంతటా తెలంగాణ పథకాలు అమలు చేయాల్సిన అవసరం ఉందని అన్నారు. తెలంగాణ భవన్ లో జరిగిన కార్యక్రమంలో కుమారస్వామి పాల్గొని మాట్లాడారు.
ఈ సమయంలో ఓ హీరో కూడా బీఆర్ఎస్ పార్టీకి మద్దతు తెలుపుతూ కనిపించారు. ఆయనే కుమారస్వామి కుమారుడు నిఖిల్ గౌడ. తెలుగు జాగ్వార్ అనే సినిమాతో పరిచయమయ్యాడు. భారీ బడ్జెట్ తో తెరకెక్కిన సినిమా అంచనాలను అందుకోలేకపోవడంతో నిఖిల్ గౌడ కన్నడ చిత్ర పరిశ్రమకే పరిమితమయ్యాడు. ఇప్పుడు హైదరాబాద్ లో బీఆర్ఎస్ ఆవిర్భావ సభలో పాల్గొనడంతో తెలుగు మీడియా ఆయనపై స్పెషల్ ఫోకస్ పెట్టింది. జేడీఎస్ నేతగా కర్ణాటకలో పాపులర్ అవుతున్న నిఖిల్ తెలంగాణలో టీఆర్ఎస్ అమలు చేస్తున్న పథకాలపై ప్రశంసలు కురిపించాడు. కేసీఆర్ విజన్ బాగుందని ఆయన మెచ్చుకున్నారు. త‌న విజ‌న్‌తో తెలంగాణ‌ను అభివృద్ధి ప‌థంలో కేసీఆర్ న‌డిపార‌ని, అలాంటి విజ‌న్‌ను ఇప్పుడు దేశ‌వ్యాప్తం చేయాల‌ని నిఖిల్ అన్నారు. గ‌డిచిన 8 ఏళ్ల‌లో తెలంగాణలో అభివృద్ధి వేగంగా సాగింద‌న్నారు. ద‌ళిత బంధు ప‌థ‌కం బాగుందని నిఖిల్ తెలిపారు. కాంగ్రెస్‌, బీజేపీ పార్టీలు ద‌ళితుల్ని ప‌ట్టించుకోలేద‌న్నారు.