Telangana : మహిళలకు గుడ్ న్యూస్... వారి ఖాతాల్లో నెలకు రూ.2500లు.

రేవంత్ రెడ్డి ఈసారి జమిలి ఎన్నికలు వస్తాయన్న ధీమాలో ఉన్నారు. 2029లోనే ఒకే సారి దేశ వ్యాప్తంగా ఎన్నికలు జరుగుతాయని ఆయన పదే పదే చెబుతున్నారు. ఆయన లెక్క ప్రకారం జరిగినా 2029 సంవత్సరానికి గాను తెలంగాణాలో ఎన్నికలు జరిగే అవకాశముండదు. అంటే సాధారణ ఎన్నికలకు ఇంకా మూడేళ్ల సమయం ఉందని ఆయన లెక్క. అయినా సరే ప్రజలకు ఇచ్చిన అన్ని హామీలను నెరవేర్చాలన్న ఉద్దేశ్యంలో ఉన్నారు. ప్రధానంగా మహిళా ఓటు బ్యాంకుపై ఆయన కన్నేసినట్లు కనపడుతుంది. మహిళలు అత్యధికంగా వెన్నుదన్నుగా నిలిస్తే తప్ప అధికారంలోకి రావడం ఎక్కడైనా సాధ్యం కాదు. అందుకే మహాలక్ష్మి పథకం కింద ఇచ్చిన అన్ని హామీలను అమలు చేయాలని నిర్ణయించినట్లు తెలిసింది.

అందులో ప్రధానమైనది మహిళలకు నెలకు రెండు వేల ఐదు వందల రూపాయలు ఇస్తామని ప్రకటించారు. దీనిపై త్వరలోనే అధికారిక ప్రకటన త్వరలోనే విడుదల కానుంది. హామీ ఇచ్చి రెండున్నరేళ్లు అవుతున్నా అమలు చేయడం లేదన్న అసంతృప్తితో ఉన్నారని గుర్తించిన రేవంత్ రెడ్డి త్వరలోనే వారి ఖాతాల్లో నగదు జమ అయ్యేందుకు గ్రీన్ సిగ్నల్ ఇచ్చారని తెలిసింది.అయితే ఈ పధకం కింద అర్హులెంత మంది? అన్న దానిపై లెక్క తేల్చాలని ఇప్పటికే ముఖ్యమంత్రి రేవంత్ రెడ్డి అధికారులను ఆదేశించినట్లు తెలిసింది. విధివిధానాలు కూడా నిర్ణయించాలని కోరినట్లు తెలిసింది. తెలుపు రంగు కార్డు ఉన్న నిరుపేద మహిళలకు మాత్రమే ఈ పథకం కింద అర్హులుగా ఉండనున్నారు. ఇప్పటి వరకూ నిధులు కొరత కారణంగానే అమలు చేయలేకపోయామని, ఎన్నికలతో సంబంధం లేకుండా అమలు చేయడానికి ఈ ఏడాది ప్రయత్నిస్తామని రేవంత్ రెడ్డి ఇటీవల మంత్రుల సమావేశంలో అన్నట్లు సమాచారం.