Shuttler Praneeth: షాకింగ్ నిర్ణయం తీసుకున్న షట్లర్ సాయి ప్రణీత్

Shuttler Praneeth:భారత షట్లర్ బి. సాయి ప్రణీత్ సంచలన నిర్ణయం తీసుకున్నాడు. బ్యాడ్మింటన్‌కు రిటైర్మెంట్ ప్రకటించాడు. 31 ఏళ్ల అతను టోక్యోలో జరిగిన ఒలింపిక్ క్రీడల తర్వాత నుండి తీవ్రమైన గాయాలతో పోరాడాడు. దాని కారణంగా అతడు రిటైర్మెంట్ ఇవ్వాలని నిర్ణయించుకున్నాడు. ఈ విషయాన్ని ప్రణీత్ తన సోషల్ మీడియా ఖాతాల్లో ధృవీకరించారు. 24 సంవత్సరాలుగా నా ప్రాణం లాంటి క్రీడకు వీడ్కోలు పలికేందుకు, రిటైర్మెంట్ ప్రకటించేందుకు సిద్ధమయ్యానని ప్రణీత్ తెలిపాడు. ‘‘భావోద్వేగాలతో వీడ్కోలు చెబుతున్నాను. గత 24 ఏళ్లుగా నాకు ఊపిరిగా ఉన్న ఆటకు ఇక వీడ్కోలు. ఈ రోజు నా జీవితంలో నూతన అధ్యాయాన్ని మొదలుపెడుతున్నాను. జీవితంలో ఈ స్థాయికి తీసుకొచ్చింది ఈ ఆటనే. బ్యాడ్మింటన్ నా ఫస్ట్ లవ్. నా క్యారక్టర్‌ను బ్యాడ్మింటన్ తీర్చి దిద్దింది. నా జీవితానికి ఒక అర్థం తీసుకొచ్చింది. ఇన్నేళ్ల ఆటలో జ్ఞాపకాలు, అధిగమించిన సవాళ్లు ఎప్పటికీ నా హృదయంలో స్థిరంగా ఉంటాయి’’ అని ప్రణీత్ పోస్టు పెట్టాడు.