సెమీస్ లో సింధు ఓటమి.. రెఫరీలతో గొడవ
దూకుడుగా ఆడి తొలి గేమ్‌ను దక్కించుకున్న సింధు.. రెండో గేమ్‌ లో 14-11తో ఆధిక్యంలో ఉన్న సమయంలో సర్వీస్ ఆలస్యం చేస్తోందన్న..
ఆసియా బ్యాడ్మింటన్ చాంపియన్‌షిప్‌లో పీవీ సింధు సెమీస్ లో ఓడింది. దీంతో ఆమెకు కాంస్యం దక్కనుంది. టాప్ సీడ్, ప్రపంచ రెండో ర్యాంకర్ అకానె యమగుచి (జపాన్)తో జరిగిన మహిళల సింగిల్స్ సెమీస్‌లో సింధు 21-13, 19-21, 16-21తో ఓటమి పాలైంది. దూకుడుగా ఆడి తొలి గేమ్‌ను దక్కించుకున్న సింధు.. రెండో గేమ్‌ లో 14-11తో ఆధిక్యంలో ఉన్న సమయంలో సర్వీస్ ఆలస్యం చేస్తోందన్న కారణంతో సింధుకు రిఫరీ ఒక పెనాల్టీ పాయింట్ విధించాడు. దీంతో రిఫరీతో వాదనకు దిగిన సింధు చీఫ్ రిఫరీకి ఫిర్యాదు చేసింది. ఈ ఘటన తర్వాత సింధు ఏకాగ్రత కోల్పోయింది. యమగుచి ఆ ఛాన్స్ ను వదులుకోలేదు. దూకుడు పెంచి వరుసగా పాయింట్లను గెలుచుకుని ఆధిక్యంలోకి వెళ్లింది. మూడో గేమ్‌లో యమగుచి 21-16తో గెలుచుకుని ఫైనల్స్‌కు దూసుకెళ్లింది. ఓడిన సింధు కాంస్యంతో సరిపెట్టుకుంది.
మ్యాచ్ అనంతరం సింధు మాట్లాడుతూ.. "మీరు చాలా సమయం తీసుకుంటున్నారని అంపైర్ నాకు చెప్పారు, కానీ ప్రత్యర్థి ఆ సమయంలో సిద్ధంగా లేదు," అని చెప్పుకొచ్చింది. "కానీ అంపైర్ ఆమెకు అకస్మాత్తుగా పాయింట్ ఇచ్చాడు. ఇది నిజంగా అన్యాయం. నేను ఓడిపోవడానికి అది ఒక కారణమని నేను భావిస్తున్నాను. ఆ సమయంలో అది 14-11 మరియు 15-11 కావచ్చు కానీ.. స్కోర్ 14-12 అయ్యింది. ఆ తర్వాత ఆమె వరుసగా పాయింట్లు సాధించింది. ఇది చాలా అన్యాయమని నేను భావిస్తున్నాను. బహుశా నేను మ్యాచ్ గెలిచి ఫైనల్‌లో ఆడి ఉండవచ్చు." అని సింధు తెలిపింది.