ఫుట్‌బాల్ దిగ్గజం క్రిస్టియానో రొనాల్డో ఇంట్లో తీవ్ర విషాదం నెలకొంది. రొనాల్డో-జార్జినా రోడ్రిగ్జ్ జంటకు అప్పుడే పుట్టిన కవలల్లో ఒకరు మృతి చెందారు. రొనాల్డో ఈ విషయాన్ని ఇన్‌స్టాగ్రామ్ ద్వారా అభిమానులకు తెలుపుతూ తన ఆవేదనను పంచుకున్నాడు.
రొనాల్డో గత అక్టోబర్‌లో సోషల్ మీడియా పోస్ట్‌లో తమ జంట కవలలు కాబోతున్నట్లు వెల్లడించాడు. మాంచెస్టర్ యునైటెడ్ ఫార్వార్డ్ ట్విట్టర్ ఖాతాలో విడుదల చేసిన పోస్ట్‌లో, ఆడపిల్ల జన్మించినట్లు ధృవీకరించారు. "మా మగబిడ్డ చనిపోయాడని మా ప్రగాఢ విచారంతో ప్రకటించాలి. ఇది ఏ తల్లిదండ్రులు అనుభవించలేని తీరని బాధ" అని రొనాల్డో, రోడ్రిగ్జ్ సంయుక్తంగా సంతకం చేసిన ప్రకటనలో తెలిపారు. అప్పుడే పుట్టిన తమ బాబు చనిపోయిన విషయాన్ని పంచుకుంటున్నందుకు బాధగా ఉందని పేర్కొన్నాడు. ఇది భరించలేని విషాదమని, అయితే పాప బతికి ఉన్న విషయం ఒక్కటే ఇప్పుడు తమకు ఆనందాన్ని, ఆశను ఇస్తోందని తెలిపాడు. ఈ కష్టకాలంలో తమ వెన్నంటి ఉన్న వైద్యులు, నర్సులకు ధన్యవాదాలు తెలుపుకుంటున్నట్టు చెప్పాడు.
ఓల్డ్ ట్రాఫోర్డ్‌కు తిరిగి వచ్చిన రొనాల్డో ప్రీమియర్ లీగ్‌లో 15 గోల్స్ చేశాడు. 37 ఏళ్ల అతను యునైటెడ్ జట్టు.. నార్విచ్ సిటీని ఓడించడంలో సహాయపడ్డాడు. తన కెరీర్‌లో 60వ హ్యాట్రిక్ సాధించాడు. మాంచెస్టర్ యునైటెడ్ మంగళవారం రాత్రి లీగ్ మ్యాచ్‌లో లివర్‌పూల్‌తో తలపడుతుంది. రొనాల్డో జంటకు ఇప్పటికే నలుగురు పిల్లలు ఉన్నారు. తమకు కవలలు జన్మించబోతున్నట్టు గతేడాది అక్టోబరులో ఈ జంట ప్రకటించింది.