అమెరికా, దక్షిణ కొరియా సంయుక్తంగా నిర్వహించే భారీ సైనిక విన్యాసాలు సోమవారం ప్రారంభమయ్యాయి. వేలాది మంది సైనికులు పాల్గొంటున్న ఈ కార్యక్రమం మధ్యప్రాచ్యంలో యుద్ధ పరిస్థితులు ఉత్కంఠ పెరుగుతున్న సమయంలో జరుగుతోంది. దక్షిణ కొరియా సంయుక్త సైనికాధికారుల కమిటీ తెలిపిన ప్రకారం ‘ఫ్రీడమ్ షీల్డ్’ పేరిట జరిగే ఈ విన్యాసాలు మార్చి 19 వరకు కొనసాగనున్నాయి. ఇందులో సుమారు 18 వేల మంది దక్షిణ కొరియా సైనికులు పాల్గొంటున్నారు. అయితే దక్షిణ కొరియాలో శిక్షణలో పాల్గొంటున్న అమెరికా సైనికుల సంఖ్యను అమెరికా ఫోర్సెస్ కొరియా వెల్లడించలేదు. ఈ సంయుక్త విన్యాసాల సమయంలో అమెరికా కొన్ని సైనిక వనరులను దక్షిణ కొరియా నుంచి తరలించి ఇరాన్కు వ్యతిరేకంగా జరుగుతున్న పోరాటానికి మద్దతుగా మధ్యప్రాచ్యానికి పంపుతున్నట్టు దక్షిణ కొరియా మీడియాలో ఊహాగానాలు వెలువడ్డాయి.
సైనిక సామగ్రి కదలికలపై...
అయితే భద్రతా కారణాల వల్ల సైనిక సామగ్రి కదలికలపై వివరాలు చెప్పలేమని అమెరికా ఫోర్సెస్ కొరియా గతవారం తెలిపింది. అమెరికా పేట్రియట్ క్షిపణి నిరోధక వ్యవస్థలు సహా కొన్ని పరికరాలను మధ్యప్రాచ్యానికి తరలిస్తున్నారన్న వార్తలపై దక్షిణ కొరియా అధికారులు కూడా వ్యాఖ్యానించలేదు. అయితే ఈ చర్యల వల్ల రెండు దేశాల సంయుక్త రక్షణ వ్యవస్థపై గణనీయమైన ప్రభావం ఉండదని చెప్పారు. ఈ విన్యాసాలు ఉత్తర కొరియాను అసహనానికి గురి చేసే అవకాశముంది. అమెరికా–దక్షిణ కొరియా సంయుక్త విన్యాసాలను ఉత్తర కొరియా చాలా కాలంగా ‘దాడి సాధన’గా అభివర్ణిస్తూ వస్తోంది. వాటిని కారణంగా చూపుతూ తాము కూడా సైనిక ప్రదర్శనలు, ఆయుధ పరీక్షలు పెంచుతూ వచ్చింది. అయితే ఈ విన్యాసాలు రక్షణాత్మక స్వభావం కలవని మిత్రదేశాలు చెబుతున్నాయి.
కిమ్ సంకేతాలతో...
2019లో ఉత్తర కొరియా నాయకుడు కిమ్ జాంగ్ ఉన్, అప్పటి అమెరికా అధ్యక్షుడు డొనాల్డ్ ట్రంప్ మధ్య జరిగిన శిఖరాగ్ర సమావేశం విఫలమైన తర్వాత వాషింగ్టన్, సియోల్లతో ఉన్న ముఖ్యమైన చర్చలను ఉత్తర కొరియా నిలిపివేసింది. ఇటీవలి సంవత్సరాల్లో ఉద్రిక్తతలు మరింత పెరిగాయి. ఉక్రెయిన్పై రష్యా దాడిని అవకాశంగా తీసుకుని కిమ్ తన అణ్వాయుధ కార్యక్రమాన్ని వేగవంతం చేశారని విశ్లేషకులు చెబుతున్నారు. అలాగే మాస్కోతో సైనిక సంబంధాలు పెంచి రష్యాకు వేలాది సైనికులు, పెద్ద మొత్తంలో ఆయుధాలు పంపినట్లు సమాచారం.గత నెల ప్యాంగ్యాంగ్లో జరిగిన ప్రధాన రాజకీయ సమావేశంలో దక్షిణ కొరియాను ‘శత్రువు’గా చూస్తున్న తన కఠిన వైఖరిని కిమ్ మళ్లీ స్పష్టం చేశారు. అయితే అమెరికాతో చర్చలకు తలుపు పూర్తిగా మూయలేదని సంకేతాలు ఇచ్చారు. చర్చలకు ముందుగా ఉత్తర కొరియా అణ్వాయుధాలను వదిలేయాలన్న అమెరికా డిమాండ్ను ఉపసంహరించాలన్నారు.
చర్చలు కొనసాగించాలని...
‘ఫ్రీడమ్ షీల్డ్’ అమెరికా–దక్షిణ కొరియా నిర్వహించే రెండు వార్షిక ‘కమాండ్ పోస్ట్’ విన్యాసాల్లో ఒకటి. మరో విన్యాసం ‘ఉల్చి ఫ్రీడమ్ షీల్డ్’, ఇది ఆగస్టులో జరుగుతుంది. ప్రధానంగా కంప్యూటర్ ఆధారిత అనుకరణలతో జరిగే ఈ విన్యాసాలు సంయుక్త సైనిక కార్యాచరణ సామర్థ్యాలను పరీక్షించడమే లక్ష్యంగా ఉంటాయి. యుద్ధ పరిస్థితుల మార్పులు, భద్రతా సవాళ్లను కూడా ఇందులో పరిగణలోకి తీసుకుంటారు. మార్చిలో జరిగే ఈ విన్యాసాలతో పాటు ‘వారియర్ షీల్డ్’ పేరిట భౌతిక శిక్షణ కార్యక్రమాలు కూడా నిర్వహిస్తారు. అయితే గత ఏడాది 51 ఫీల్డ్ విన్యాసాలు జరిగినప్పటికీ ఈసారి సంఖ్యను 22కు తగ్గించారు. సాధారణంగా ఫీల్డ్ విన్యాసాలు ఏడాది పొడవునా విస్తరించి ఉంటాయని అమెరికా, దక్షిణ కొరియా సైన్యాలు చెబుతున్నాయి. అయితే ఉత్తర కొరియాతో సంభాషణకు అవకాశం కల్పించాలనే ఉద్దేశంతో వసంతకాల విన్యాసాలను కొంత తగ్గిస్తున్నారన్న అంచనాలు ఉన్నాయి. లిబరల్ అభిప్రాయాలు కలిగిన దక్షిణ కొరియా అధ్యక్షుడు లీ జే మ్యూఙ్ దౌత్య చర్చలకు ఆసక్తి చూపుతున్నారు. ఆయన ప్రభుత్వంలోని కొందరు ఉన్నతాధికారులు కూడా మార్చి చివరి లేదా ఏప్రిల్లో ట్రంప్ చైనాకు వెళ్లే అవకాశంతో ప్యాంగ్యాంగ్తో చర్చలకు మార్గం కలగవచ్చని ఆశాభావం వ్యక్తం చేస్తున్నారు.