Israel - Iran War : ఒక్కసారిగా పెరిగిన చమురు ధరలు..యుద్ధం ఆగినా తగ్గవట

చమురు ధరల భారీ పెరుగుదలతో కుటుంబాలు, వ్యాపారాలు ఇబ్బందులు ఎదుర్కొంటున్నాయని, వీటిని తట్టుకునేందుకు వరుస చర్యలు సిద్ధం చేస్తున్నామని చెప్పారు. యుద్ధం ప్రారంభమైనప్పటి నుంచి యూరప్‌లో గ్యాస్ ధరలు సుమారు 70 శాతం, చమురు ధరలు 60 శాతం పెరిగాయని వెల్లడించారు. దిగుమతి ఫాసిల్ ఇంధనాలపై యూరోపియన్ యూనియన్ ఖర్చు 14 బిలియన్ యూరోలు పెరిగిందని పేర్కొన్నారు. సభ్య దేశాలు విడివిడిగా చర్యలు తీసుకుంటే మార్కెట్లకు ప్రతికూల సంకేతాలు వెళ్లే అవకాశం ఉందని, అందరూ సమన్వయంతో ముందుకు రావాలని సూచించారు. త్వరలో ప్రకటించనున్న చర్యల ప్యాకేజీలో గ్యాస్ ధరలను విద్యుత్ ధరల నుంచి వేరుచేసే విధానాలు ఉంటాయని తెలిపారు. విద్యుత్‌పై పన్ను తగ్గింపు అంశాన్ని కూడా పరిశీలిస్తున్నామని చెప్పారు.

2022లో జరిగిన గ్యాస్ సంక్షోభం మాదిరిగా కంపెనీలు భారీ లాభాలు పొందే పరిస్థితి తిరిగి వస్తుందని అనుకోవడం లేదని అన్నారు. అయితే అవసరమైతే ఒకసారి మాత్రమే విధించే ‘విండ్ఫాల్ ట్యాక్స్’ విధించే అవకాశాన్ని కూడా తిరస్కరించలేమన్నారు. అత్యంత ఒత్తిడిలో ఉన్న వర్గాలు, పరిశ్రమలకు ఆర్థిక సహాయం అందించేందుకు సభ్య దేశాలకు ఇప్పుడు మంచి అవకాశాలు ఉన్నాయని చెప్పారు. ఈ సౌకర్యాలను మరింత సులభంగా, విస్తృతంగా అందించేలా కమిషన్ చర్యలు తీసుకుంటుందని తెలిపారు.ఇంటర్నేషనల్ ఎనర్జీ ఏజెన్సీ సూచించిన 10 అంశాల ప్రణాళికను కూడా సభ్య దేశాలు పరిగణనలోకి తీసుకోవాలని ఆయన సూచించారు. ఇంటి నుంచే పని చేయడం, రహదారులపై వేగ పరిమితి తగ్గించడం, ప్రజా రవాణా వినియోగం పెంచడం, కార్ షేరింగ్ ప్రోత్సహించడం వంటి అంశాలు అందులో ఉన్నాయి.

రష్యా గ్యాస్ కొనుగోళ్లపై నిషేధాన్ని యూరోపియన్ యూనియన్ కొనసాగిస్తుందని స్పష్టం చేశారు. యుద్ధానికి ముందు రష్యా వాయుపై ఆధారపడటం 45 శాతం ఉండగా, ఇప్పుడు అది 10 శాతానికి తగ్గిందన్నారు. ఇతర సరఫరాదారుల నుంచి, ముఖ్యంగా అమెరికా నుంచి దిగుమతులు పెరిగిన తర్వాత ఈ ఆధారపడటం పూర్తిగా తగ్గుతుందని చెప్పారు. అజర్‌బైజాన్, అల్‌జీరియా, కెనడా వంటి దేశాలతో పాటు మరికొన్ని చిన్న ఉత్పత్తిదారుల నుంచి కూడా ఇంధన వనరులు పరిశీలిస్తున్నామని తెలిపారు. “పుతిన్ ఇంధనాన్ని ఆయుధంగా మార్చి సభ్య దేశాలను బ్లాక్‌మెయిల్ చేసిన గత తప్పును మళ్లీ చేయకూడదు. ఉక్రెయిన్‌లో జరుగుతున్న భయంకర యుద్ధానికి పరోక్షంగా నిధులు అందించే ఇంధనాన్ని కొనడం అస్సలు సమంజసం కాదు” అని జోర్గెన్‌సెన్ వ్యాఖ్యానించారు.