Hyderabad : హైదరాబాద్ సగం ఖాళీ అయిందిగా?

ప్రధానంగా హైదరాబాద్ లో నివసించే వారు ఎక్కువగా తమ సొంతూళ్లలోనే సంక్రాంతి పండగ జరుపుకుంటారు. ఈ ఏడాది మరీ ఎక్కువ సెలవులు రావడంతో గత శుక్రవారం రాత్రి బయలుదేరి వెళ్లిన వారు ఈ ఆదివారం వరకూ సొంతూళ్లలో బంధుమిత్రుల మధ్య గడిపే అవకాశం లభించింది. హైదరాబాద్ నగరంలో ఉపాధి కోసం వచ్చిన వారు సొంతూళ్లకు వెళ్లి తమ బంధుమిత్రులను కలుసుకుని ఆనందంగా గడిపే సమయాన్ని వదులుకునేందుకు ఎవరూ ఇష్టపడరు. అందుకే సంక్రాంతి పండగకు వెళ్లేందుకు రైళ్లు, బస్సులు.. లేకుంటే సొంత వాహనాల్లో అయినా బయలుదేరి వెళుతుంటారు.

సంక్రాంత్రి పండగ గ్రామీణ వాతావరణంలోనే జరుపుకోవడానికి ఎక్కువగా ఇష్టపడతారు. నగరంలో గ్రామీణ వాతావరణం సృష్టించేందుకు కొందరు తంటాలుపడుతున్నా అది కృతకంగానే ఉంటుంది. అంతే తప్ప సొంతూళ్లకు వెళ్లి.. ప్రయాణం చేస్తేనే అందులో మజా ఉంటుంది. తమ గ్రామాన్ని తనివి తీరా చూసుకుని మురిసిపోయే సందర్భమిది. తాము చిన్నప్పుడు తిరిగిన వీధుల్లో తిరగడం అంటే పెరిగిన వయసు మర్చిపోయి మళ్లీ పాత రోజులను గుర్తుకు తెస్తాయి. పెద్దల నుంచి పిల్లల వరకూ కుటుంబాలన్నీ కలసి చేసుకునే పండగ కావడంతో అందరూ పల్లెబాట పట్టారు. కోడిపందేలు.. బండ లాగుడు పోటీలు.. కబడ్డీ ఇలా చెప్పుకుంటూ పోతే సంక్రాంతి సందడిని మిస్ అవుతామని భావించి అందరూ ఇంటి బాట పడతారు. అందుకే ఇప్పుడు నగరం నిశ్శబ్దంగా మారింది.