వలపు వల.. ఈ గ్యాంగ్ చేతిలో పడ్డారంటే మీ ఆస్తులు హాంఫట్

తమిళనాడులోని సేలం ప్రాంతానికిచెందిన అలమేలు తన స్నేహితులతో కలసి ఒక గ్యాంగ్ ను ఏర్పాటు చేసుకుంది. అలిమేలుతో పాటు ఆమె స్నేహితులైన జనార్థనన్, జన ఆంసప్రియన్ లతో కలసి ఒక ముఠాగా ఏర్పడి లక్షల రూపాయలు దోచుకుంది. సేలం పోలీసులు ఈ గ్యాంగ్ ను అదుపులోకి తీసుకున్నారు. సేలం పోలీసులు తెలిపిన కథనం ప్రకారం...ముందుగా తమ సమీప ప్రాంతంలోని డబ్బున్నవారిని జనార్థనన్, జన ఆంసప్రియన్ గుర్తిస్తారు. అందులో ప్రభుత్వోద్యుగులను కూడా ఎంపిక చేసుకుంటారు. వారి పూర్తి సమాచారంతో పాటు ఫోన్ నెంబర్లను సేకరించి అలిమేలుతో ఫోన్ చేయిస్తారు. తాను ఒంటరిగా ఉన్నానని, ఇంటికి రావాలంటూ అలిమేలు తియ్యని మాటలతో వలపు పిలుపు అందిస్తుంది.

అయితే ఒంటరిగా వచ్చిన వారిపై దాడి చేయడమే కాకుండా వీడియోలు కూడా తీసేవారు. తర్వాత వాటిని సామాజిక మాధ్యమాల్లో పెడతామని బెదిరించి అందిన కాడికి దండుకుంటారు. చివరకు సేలం జిల్లా ఒమలూర్ పోలీస్ స్టేషన్ లో ఎస్సై గా ఉన్న భూపతి కూడా వీరి వలలో చిక్కుకున్నారు. డబ్బులు, బంగారాన్ని సమర్పించుకున్నాడు. అయితే భూపతి పోలీసులకు సమాచారం ఇవ్వడంతో సేలం పోలీసులు అలమేలుతో పాటు జనార్థనన్, జన ఆంసప్రియన్ లు కూడా అదుపులోకి తీసుకున్నారు. ఈ గ్యాంగ్ లో మొత్తం తొమ్మిది మంది సభ్యులున్నట్లు గుర్తించిన పోలీసులు వారిని అదుపులోకి తీసుకుని విచారిస్తున్నారు. వారి సెల్ ఫోన్ లను సీజ్ చేశారు. కీలక ఆధారాలతో వారిపై కేసు నమోదు చేశారు. అలిమేలు బాధితులు ఒక్కొక్కరూ వచ్చి పోలీసులకు ఫిర్యాదు చేస్తున్నారు.