గూగుల్ కార్యాలయానికి అమ్మను తీసుకెళ్లిన హైదరాబాదు యువకుడు అభిజయ్
అమ్మ త్యాగాలకు గుర్తుగా చేసిన భావోద్వేగ పోస్ట్ ,హార్వర్డ్ నుంచి గూగుల్ వరకు ప్రయాణం
హైదరాబాద్: అమెరికాలో గూగుల్లో పనిచేస్తున్న హైదరాబాదు యువకుడు అభిజయ్ అరొరా, ఇటీవల తన తల్లిని సాన్ఫ్రాన్సిస్కోలోని గూగుల్ కార్యాలయానికి తీసుకెళ్లి జీవితంలో చిరస్మరణీయ క్షణాన్ని అనుభవించాడు. చిన్ననాటి కల నెరవేరిందని, ఆ రోజు తన జీవితంలో మరచిపోలేని రోజని సోషల్ మీడియాలో పోస్ట్ చేశాడు.
అభిజయ్ తన తల్లిపై గర్వం వ్యక్తం చేస్తూ ఆమె త్యాగాలను గుర్తు చేసుకున్నాడు. ఆయన తల్లి భారతీయ రెవెన్యూ సర్వీస్ (ఐఆర్ఎస్) అధికారి. 1998లో యూపీఎస్సీ పరీక్షలో ఉత్తీర్ణత సాధించిన తన కుటుంబంలో తొలి వ్యక్తి. సాధారణ కుటుంబంలో పెరిగిన ఆమె వీధి దీపాల కింద చదువుకొని, రెండవచేతి పుస్తకాలతోనే సివిల్స్ పరీక్షకు సిద్ధమయ్యిందని అభిజయ్ చెప్పాడు. స్వాతంత్ర్యానంతరం భారత్కు వలస వచ్చిన తల్లిదండ్రులు తన చదువుకోసం ప్రతి రూపాయి కూడబెట్టారని గుర్తుచేసుకున్నాడు. పాఠశాల రోజులలో ఉదయం 4 గంటలకు లేచి తనతో చదువుకునేదని, ప్రతి దశలో తల్లి అండగా నిలిచిందని పేర్కొన్నాడు.
“నీ త్యాగాలకు నేను చేసే ప్రతిఫలం ఎంతైనా తక్కువే అమ్మ” అని భావోద్వేగంగా రాశాడు.
అభిజయ్ హైదరాబాద్లోని విద్యారణ్య హైస్కూల్లో చదివి, ఆ తర్వాత హార్వర్డ్ బిజినెస్ స్కూల్ నుంచి గౌరవాలతో పట్టా పొందాడు. తన కన్వొకేషన్ వేడుకలో తల్లి కన్నీళ్లు పెట్టుకోవడమే తనకు పెద్ద బహుమానమని తెలిపాడు. ప్రస్తుతం అమెరికాలో గూగుల్లో పనిచేస్తున్న ఆయన, భవిష్యత్తులో తన హార్వర్డ్, గూగుల్ నెట్వర్క్ ద్వారా యువతకు ఉపకారం చేయాలని సంకల్పించాడు.
“ఏఐ యుగంలోనే అతిపెద్ద ఉచిత కెరీర్ కమ్యూనిటీని నిర్మించడం నా లక్ష్యం” అని అభిజయ్ చెప్పాడు.
తన విజయానికి ముందు ఎన్నో అపజయాలు ఎదురైనప్పటికీ తల్లి విశ్వాసమే తాను ముందుకు సాగడానికి ప్రేరణగా నిలిచిందని అభిజయ్ పేర్కొన్నాడు.
“పెద్ద కలలు కనేవారికి చెప్పదలచుకున్నది ఒక్కటే కలలు నిజమవుతాయి, కేవలం వదిలిపెట్టకండి” అని సందేశమిచ్చాడు.