Crypto Trading scam: ఇన్‌స్టాగ్రామ్ ప్రకటనతో మోసం… హైదరాబాద్ వ్యక్తికి రూ.1.88 కోట్ల నష్టం

కూకట్‌పల్లి ప్రాంతానికి చెందిన 69 ఏళ్ల రిటైర్డ్ ఉద్యోగి ఆన్‌లైన్ క్రిప్టో ట్రేడింగ్ మోసంలో రూ.1,88,56,648 కోల్పోయినట్లు పోలీసులకు ఫిర్యాదు చేశారు. ఇన్‌స్టాగ్రామ్‌లో వచ్చిన ప్రకటన చూసి ఒక ట్రేడింగ్ వేదికలో చేరిన తర్వాత ఈ మోసం జరిగిందని తెలిపారు.

ఫిర్యాదు ప్రకారం, కూకట్‌పల్లిలోని మెడికల్ సొసైటీకి చెందిన కుడుముల సాంబశివరెడ్డి నవంబర్ 20, 2025న ఇన్‌స్టాగ్రామ్‌లో కనిపించిన ప్రకటన ఆధారంగా “నాకా సొల్యూషన్స్” అనే ఏఐ ఆధారిత ట్రేడింగ్ సేవలో చేరారు. ఆ తరువాత తనను “సిద్ధార్థ్ మహేశ్వరి”గా పరిచయం చేసుకున్న వ్యక్తి సంప్రదించిందని చెప్పారు. క్రిప్టో, స్టాక్ మార్కెట్లలో ఏఐ టూల్స్ సహాయంతో పెట్టుబడులు పెట్టిస్తామని చెప్పిందని పేర్కొన్నారు.

ఆమె సూచనలతో నాకా సొల్యూషన్స్‌కు సంబంధించిన మొబైల్ యాప్ డౌన్‌లోడ్ చేసి, తన ఈమెయిల్ ఐడీతో ట్రేడింగ్ ఖాతా తెరవడానికి సహాయం చేసిందని తెలిపారు.

చిన్న మొత్తాలతో ప్రారంభం

మొదట తన ఐసీఐసీఐ బ్యాంక్ ఖాతా నుంచి రూ.23,000 (సుమారు 250 డాలర్లు) యాప్‌లో జమ చేశానని ఫిర్యాదులో తెలిపారు. ఆ వేదికలో కొంత లాభం చూపించడంతో పాటు 3 డాలర్లు ఉపసంహరించుకునే అవకాశం కూడా ఇచ్చారని చెప్పారు. దీంతో నమ్మకం పెరిగిందన్నారు.

ఆ తర్వాత గ్రూప్ చాట్‌ల ద్వారా ట్రేడింగ్ సూచనలు ఇస్తూ, తమ ఏఐ వ్యవస్థ నష్టాలు లేకుండా లాభాలు తెస్తుందని అనుమానితులు చెప్పినట్లు పోలీసులు తెలిపారు. ఈ నమ్మకంతో తరువాతి రోజుల్లో రూపాయలను డాలర్లుగా మార్చి పలుమార్లు డబ్బులు జమ చేశానని బాధితుడు పేర్కొన్నారు.

డిసెంబర్ 9, 2025 నాటికి తన ఖాతాలో 90 వేల డాలర్లు లాభంగా చూపించారని చెప్పారు. అందులో నుంచి 80 వేల డాలర్లు తీసుకోవడానికి ప్రయత్నించగా సమస్యలు మొదలయ్యాయని తెలిపారు.

డబ్బు ఇవ్వాలంటే కొత్త కొత్త చార్జీలు

డబ్బు తీసుకోవాలంటే ముందుగా పలు రకాల ఫీజులు చెల్లించాలని యాప్ నిర్వాహకులు కోరినట్లు ఫిర్యాదులో పేర్కొన్నారు. అందులో

• 8% కన్వర్షన్ ఫీ — 80 వేల డాలర్లపై 6,400 డాలర్లు
• క్యాపిటల్ గెయిన్స్ పన్ను
• ట్రాన్సాక్షన్ ఫీ
• గ్యాస్ ఫీ
• క్రిప్టో పన్ను
• సెక్యూరిటీస్ ట్రాన్సాక్షన్ ట్యాక్స్ (STT)
• స్వాప్ చార్జీలు
• ఓవర్సీస్ ట్రాన్సాక్షన్ ఫీ
• డిక్లరేషన్ చార్జీలు

ఇలా వరుసగా డబ్బులు చెల్లించిన తర్వాత కూడా డబ్బు విడుదల కాలేదని తెలిపారు. దీంతో ఇది మోసం అని గుర్తించానని చెప్పారు.

విదేశీ నంబర్ల అనుమానం

ఈ వ్యవహారంలో “నాకా సొల్యూషన్స్”, “నాకా ఫైనాన్స్”, “ఈషా పాండే”, “బార్క్లేస్ విలియమ్స్” పేర్లతో పాటు కస్టమ్స్ అధికారిగా చెప్పుకున్న వ్యక్తి కూడా సంప్రదించినట్లు ఫిర్యాదులో ఉంది. వీరిలో పలువురు యునైటెడ్ కింగ్డమ్ (+44) కోడ్ ఉన్న ఫోన్ నంబర్లు ఉపయోగించినట్లు పోలీసులు తెలిపారు.

మొత్తంగా రూ.1,88,56,648 ఈ వేదికకు బదిలీ చేశానని, తిరిగి ఒక్క రూపాయి కూడా రాలేదని బాధితుడు ఫిర్యాదులో పేర్కొన్నారు.

ఈ ఫిర్యాదు ఆధారంగా పోలీసులు కేసు నమోదు చేసి దర్యాప్తు ప్రారంభించారు. ఫోన్ నంబర్లు, డబ్బు బదిలీ వివరాలు, యాప్ లింక్‌లను పరిశీలిస్తున్నారు.