Breaking : జూబ్లీహిల్స్ లో నో.. సెంటిమెంట్ ఓన్లీ డెవలెప్ మెంట్

ఇలా తెలంగాణలో జరిగే ఉప ఎన్నికల చరిత్ర చూస్తే మృతి చెందిన వారి కుటుంబ సభ్యులను ఓటర్లు ఆదరించలేదు. ప్రస్తుతం జూబ్లీహిల్స్ నియోజకవర్గం ఉప ఎన్నికల్లోనూ అదే పంథాను ప్రజలు అవలంబించినట్లుంది. ప్రతిపక్షంలో ఉన్న వారిని గెలిపించినా తమ నియోజకవర్గం అభివృద్ధి చెందే అవకాశం లేదన్నది ఓటర్ల ఆలోచన కావచ్చు. అందులోనూ కొంత నిజముంది. ప్రతిపక్షంలో ఉండి నియోజకవర్గాన్ని అభివృద్ధి చేయడం కష్టం. అదే అధికార పార్టీ గెలిస్తే కొంత నిధులు నియోజకవర్గానికి ప్రభుత్వం కేటాయించే ఛాన్స్ ఉంటుందన్న ఆలోచన కూడా ప్రజలను కాంగ్రెస్ వైపు మళ్లించాయని చెప్పాలి. ఇప్పుడు బీఆర్ఎస్ కు ఓటేసినా అది వృధాయేనని భావించి ఎక్కువ మంది ప్రజలు జూబ్లీహిల్స్ లో కాంగ్రెస్ వైపు నిలిచారు.

మొదటి రౌండ్ మినహాయించి ఇక మిగిలిన అన్ని రౌండ్లలోనూ కాంగ్రెస్ అభ్యర్థి నవీన్ యాదవ్ కు ఆధిక్యత లభించడం చూస్తే అనేక అంశాలు కాంగ్రెస్ అభ్యర్థి గెలుపుపై ప్రభావం చూపాయని అనుకోవాలి. అంతే తప్ప బీఆర్ఎస్ ఇప్పటికిప్పుడు పూర్తిగా కనుమరుగై పోయిందనుకోవడానికి వీలులేదు. గతంలో రెండు సార్లు బీఆర్ఎస్ ఇక్కడ గెలిచిన పార్టీ. అది గుర్తుంచుకోవాలి. నవీన్ యాదవ్ గతంలో ఎంఐఎం అభ్యర్థిగా పోటీ చేసి నలభై వేల ఓట్లు సాధించి రెండో స్థానంలో నిలిచారు. పార్టీ అభ్యర్థి కూడా కొంత కాంగ్రెస్ పార్టీకి అదనపు బలంగా మారారనుకోవాలి. బస్తీల్లో పట్టున్న నవీన్ యాదవ్ కుటుంబానికి ఎక్కువ మంది ఓటర్లు అండగా నిలిచారనడంలో సందేహం లేదు. ఏడో రౌండ్ తర్వాత కాంగ్రెస్ అభ్యర్థికి 19 వేల ఓట్లు పై చిలుకు ఆధిక్యత లభించడంతో మెజారిటీ ఇరవై వేల రపాయలు పైగానే ఉంటుందని అంచనా.