Weather Report : పిడుగులు.. ఉరుములు.. మెరుపులు.. కూల్ వెదర్

ఆంధ్రప్రదేశ్ లో మరో రెండు రోజుల పాటు ఉరుములతో కూడిన వానలు పడతాయని వాతావరణ శాఖ వెల్లడించింది. పల్నాడు, గుంటూరు, కృష్ణా జిల్లాల్లో పిడుగులు పడే అవకాశముందని అమరావతి వాతావరణ శాఖ హెచ్చరించింది. రైతులు, పశువుల కాపర్లు అప్రమత్తంగా ఉండాలని సూచించింది. మరొకవైపు కొన్ని చోట్ల పొడి వాతావరణం నెలకొని ఉంటుందని తెలిపింది. పొగమంచు ప్రభావం కూడా ఉదయం పూట ఉంటుందని, గన్నవరం ఎయిర్ పోర్టులో విమానాలు ల్యాండింగ్ కు కొంత అసౌకర్యం ఏర్పడుతుందని వాతావరణ శాఖ అధికారులు అంచనా వేశారు. దక్షిణ కోస్తాలో కొన్ని చోట్ల తేలికపాటి నుంచి మోస్తరు వానలు పడతాయని తెలిపింది. రాయలసీమలో పొడి వాతావరణం ఉండే ఛాన్స్ ఉందని పేర్కొంది.

తెలంగాణలోనూ వాతావరణం ఒక్కసారిగా మారిపోయింది. బంగాళాఖాతంలో కొనసాగుతున్న అల్పపీడనం, ఉపరితల ద్రోణి కారణంగా తేలికపాటి వానలు పడతాయని హైదరాబాద్ వాతావరణ శాఖ వెల్లడించింది. కొన్ని చోట్ల మాత్రం ఉరుములు, మెరుపులతో కూడిన వానలు పడతాయని వాతావరణ శాఖ వెల్లడించింది. మిగిలిన ప్రాంతాల్లో తేలికపాటి నుంచి మోస్తరు వర్షాలు పడతాయని వెల్లడించింది. ఉష్ణోగ్రతలు కనిష్టంగానే నమోదవుతాయని కూడా వాతావరణ శాఖ వెల్లడించింది. రైతులు తమ పంట ఉత్పత్తులను కాపాడుకునే ప్రయత్నం చేయడం మంచిదని వ్యవసాయ శాఖ అధికారులు సూచిస్తున్నారు. మార్చి నెల నుంచి ఉష్ణోగ్రతలు గణనీయంగా పెరిగే అవకాశముందని వాతావరణ శాఖ అధికారులు అంచనా వేస్తున్నారు.