Rain Alert : అధికారులు అప్రమత్తంగా ఉండాల్సిందే.. అతి భారీ వర్షాలతో ప్రభుత్వాలు అలెర్ట్

తెలంగాణలో ఈ నెల 29వ తేదీ వరకూ వర్షాలు కురుస్తాయని వాతావరణ శాఖ హెచ్చరించింది. మోస్తరు నుంచి భారీ వర్షాలు కురిసే అవకాశముందని హైదరాబాద్ వాతావరణ కేంద్రం తెలిపింది. ఈరోజు కామారెడ్డి, మెదక్, జనగాం, హన్మకొండ, వరంగల్, ఖమ్మం, కొత్త గూడెం, ములుగు, జయశంకర్ భూపాలపల్లి, నిజామాబాద్, నిర్మల్, మంచిర్యాల, కొమ్రంభీం ఆసిఫాబాద్, ఆదిలాబాద్, హైదరాబాద్, రంగారెడ్డి, మేడ్చల్ మల్కాజ్ గిరి జిల్లాలకు భారీ వర్ష సూచన చేసింది. ఉరుములు మెరుపులతో కూడిన భారీ వర్షంతో పాటు బలమైన ఈదురుగాలులు కురుస్తాయని తెలిపింది. ప్రధానంగా లోతట్టు ప్రాంతాల ప్రజలు అప్రమత్తంగా ఉండాలని వాతావరణ శాఖ హెచ్చరించింది.

ఇక ఆంధ్రప్రదేశ్ లోనూ మూడు రోజుల పాటు భారీ వర్షాలు పడే అవకాశముందని విశాఖ వాతావరణ కేంద్రం తెలిపింది. ఉత్తర కోస్తాలో ఈరోజు మోస్తరు నుంచి భారీ వర్షాలతో పాటు కొన్ని ప్రాంతాల్లో అతి భారీ వర్షాలు పడే అవకాశముందని పేర్కొంది. దక్షిణ కోస్తాంధ్ర జిల్లాల్లో భారీ వర్షాలు పడే అవకాశముందని తెలిపింది. రాయలసీమలోనూ మోస్తరు వర్షాలతో పాటు బలమైన ఈదురుగాలులు వీస్తాయని తెలిపింది. అయితే రెండు తెలుగు రాష్ట్రాల్లో భారీ వర్షాలు కురుస్తుండటంతో ప్రభుత్వాలు అప్రమత్తమయ్యాయి. జిల్లాల కలెక్టర్లు అప్రమత్తంగా ఉండాలని ఆదేశాలు జారీ అయ్యాయి. అవసరమైతే జిల్లా కలెక్టర్ కార్యాలయాల్లో కంట్రోల్ రూంలను ఏర్పాటు చేయాలని కూడా ఆదేశాలు జారీ చేశారు. అన్ని శాఖల అధికారుల సమన్వయంతో పనిచేయాలని సూచించారు.