Telangana : సైకిల్ కొనుగోలుకు రుణం ఇవ్వండి.. బ్యాంకుకు చిన్నారులు
సైకిల్ కొనుగోలుకు రుణం కావాలంటూ బ్యాంకుకు చిన్నారులు వెళ్లిన ఘటన సంగారెడ్డి జిల్లాలో జరిగింది
సైకిల్ కొనుగోలుకు రుణం కావాలంటూ బ్యాంకుకు చిన్నారులు వెళ్లిన ఘటన సంగారెడ్డి జిల్లాలో జరిగింది. సంగారెడ్డి జిల్లా ఝరాసంగం మండలం బర్దిపూర్ గ్రామానికి చెందిన ఇద్దరు చిన్నారులు సైకిల్ కొనేందుకు డబ్బు కావాలని స్థానిక కెనరా బ్యాంకుకు వెళ్లి రుణం అడగడం బ్యాంకు అధికారులు, సిబ్బందితో పాటు కస్టమర్లను ఆశ్చర్యానికి గురిచేసింది. గ్రామానికి చెందిన చిన్నారులు దేవాన్ష్, రహస్యలు తమ తల్లి సునీతతో కలిసి బ్యాంకుకు వెళ్లారు. బ్యాంకులో డబ్బులు ఇస్తారని తెలుసుకుని చిన్నారులు నేరుగా బ్యాంకు మేనేజర్ వద్దకు వెళ్లి తమకు సైకిల్ కొనేందుకు డబ్బులు కావాలి అని అడిగారు.
రుణం పొందాలంటే...
ఆశ్చర్యానికి గురైన మేనేజర్, బ్యాంకులో రుణం కావాలంటే ఏదైనా తాకట్టు పెట్టాలని, మీ దగ్గర ఏముంది అని ప్రశ్నించారు. దానికి చిన్నారులు "మా దగ్గర భూమి ఉంది… బంగారం కూడా ఉంది అని అమాయకంగా సమాధానం ఇవ్వడంతో మేనేజర్ నవ్వుతో పాటు ఆనందానికి గురయ్యాడు. వారి అమాయకపు సమాధానం విన్న సిబ్బంది, అక్కడ ఉన్న కస్టమర్లు నవ్వుకున్నారు. ఆ చిన్నారులను సముదాయించి బ్యాంకు సిబ్బంది ఇంటికి పంపారు. సైకిల్ అంటే చిన్నారులకు ఎంత మోజు ఉందో ఈ ఘటన రుజువు చేస్తుంది.