సీఎం స్వగ్రామంలో మాజీ మావోయిస్టుకే ఏకగ్రీవ అవకాశం

కొండారెడ్డిపల్లి (వంగూరు): నాగర్‌కర్నూల్ జిల్లాలోని ముఖ్యమంత్రి రేవంత్‌రెడ్డి స్వగ్రామం కొండారెడ్డిపల్లిలో సర్పంచ్‌గా మాజీ మావోయిస్టు మల్లేపాకుల వెంకటయ్య ఏకగ్రీవంగా ఎంపిక అయ్యారు.

1972లో పుట్టిన వెంకటయ్య 1994లో గ్రామంలో మావోయిస్టుల సమావేశం జరిగినప్పుడు వారి పాటలకు ఆకర్షితుడై పార్టీ కార్యకర్తగా చేరారు. కల్వకుర్తి, గంగన్న, పాల్గల్ ప్రాంతాల్లో 2000 వరకు చురుకుగా పనిచేశారు. 1999లో నల్గొండ జిల్లా డిండి మండలంలోని వాయిల్‌కల్‌కు చెందిన మేనమామ కుమార్తె అరుణను వివాహం చేసుకున్నారు. దంపతులకు ఇద్దరు కుమారులు ఉన్నారు.

2001లో వెంకటయ్య కల్వకుర్తి పోలీసుల సమక్షంలో లొంగిపోయారు. అనంతరం సామాన్య జీవితంలో కలిసిపోయి 2003లో అదే స్టేషన్‌లో హోం గార్డుగా ఎంపికయ్యారు. అప్పటి నుంచి నిరవధికంగా అక్కడే కొనసాగుతున్నారు. సీఎం రేవంత్‌రెడ్డి కుటుంబానికి వెంకటయ్య సన్నిహితుడు.

కొండారెడ్డిపల్లి సర్పంచ్ పదవి ఎస్సీ రిజర్వేషన్ కావడంతో హోం గార్డు పదవికి రాజీనామా చేసి శనివారం గ్రామస్తులతో ర్యాలీగా వెళ్లి నామినేషన్ వేశారు. ర్యాలీలో పాల్గొన్న సమయంలో గ్రామస్తుల సమైక్య నిర్ణయంతో ఆయనను ఏకగ్రీవంగా ఎంపిక చేశారు. గ్రామంలో 10 వార్డులకు కూడా ఒక్కొక్కరు మాత్రమే నామినేషన్ దాఖలు చేశారు.

నామినేషన్ అనంతరం వెంకటయ్య మాట్లాడుతూ… గ్రామ అభివృద్ధికి కృషి చేస్తానని, రాష్ట్రంలో ఆదర్శ గ్రామంగా మార్చేందుకు ప్రయత్నిస్తానని చెప్పారు. సీఎం రేవంత్‌రెడ్డి, వ్యవసాయ కమిషన్ సభ్యుడు కేవీఎన్ రెడ్డి, గ్రామస్థుల సహాయానికి రుణపడి ఉంటానని పేర్కొన్నారు.