Rahul Gandhi : విద్యార్థులను కలసి వారి సమస్యలపై చర్చించి తర్వాత బావార్చిలో బిర్యానీ తిని

ఆర్టీసీ క్రాస్ రోడ్డులో ఉద్యోగాల కోసం శిక్షణ తీసుకుంటున్న యువకులతో సమావేశమయ్యారు. తాము అధికారంలోకి రాగానే సమస్యను పరిష్కరిస్తామని హామీ ఇచ్చారు. ఎలాంటి లీకులు లేకుండా పరీక్షలను సకాలంలో నిర్వహించడమే కాకుండా అన్ని ప్రభుత్వ ఉద్యోగాలను భర్తీ చేస్తామని హామీ ఇచ్చారు. గత ప్రభుత్వం వైఫల్యాలను కూడా ఈ సందర్భంగా రాహుల్ గాంధీ వారి వద్ద ప్రస్తావించారు. ఆర్టీసీ క్రాస్ రోడ్డు సమీపంలోని బావార్చి హోటల్ లో విద్యార్థులతో కలసి రాహుల్ గాంధీ బిర్యానీ తిన్నారు.

ఈరోజు కూడా రాహుల్ గాంధీ ఎన్నికల ప్రచారంలో పాల్గొననున్నారు. మొత్తం నాలుగు నియోజకవర్గాల్లో ఆయన పర్యటనలు సాగనున్నాయి. ఈరోజు ఆంథోల్, సంగారెడ్డి, కామారెడ్డిలలో జరిగే బహిరంగ సభల్లో పాల్గొంటారని పార్టీ వర్గాలు వెల్లడించాయి. ఉదయం 11.30 గంటలకు ఆంథోల్ వెళ్లి అక్కడ కాంగ్రెస్ పార్టీ అభ్యర్థికి మద్దతుగా ప్రచారాన్ని నిర్వహిస్తారు. అనంతరం 12.45 గంటలకు సంగారెడ్డికి వెళ్లి అక్కడ ప్రచారంలో పాల్గొంటారు. తర్వాత కామారెడ్డికి వెళ్లి అక్కడ రేవంత్ రెడ్డికి మద్దతుగా ప్రచారాన్ని నిర్వహించనున్నారు.