Asia Cup : వత్తిడిని యువజట్టు తట్టుకుంటుందా? ఈ పరిస్థితుల్లో సక్సెస్ రేట్ ఎంత?

ఆసియా కప్ లో భారత్ - పాకిస్తాన్ మధ్య మ్యాచ్ ఈ నెల 14వ తేదీన జరగనుంది. రెండు జట్లు సుదీర్ఘకాలం తర్వాత మైదానంలో కనిపిస్తుండటంతో ఆ రోజు రెండు దేశాలు హీటెక్కడం ఖాయమని చెప్పాలి. అయితే ఆ వత్తిడిని యువజట్టు ఎలా ఎదుర్కొంటుందన్నదే ఇప్పుడు అందరిలోనూ అనుమానం. యువజట్టులో కొందరు ఆసియా కప్ లో తొలిసారి ఆడుతుండటంతో రెండు దేశాల మధ్య జరుగుతున్న పోరులో రెండు రోజుల ముందు నుంచే ప్లేయర్లపై వత్తిడి పెరుగుతుంది. అది సహజం. సీనియర్లు అయితే దానికి అలవాటు పడ్డారు కాబట్టి వత్తిడి ప్రభావం మైదానంలో కనిపించదు. కానీ జూనియర్లు వత్తిడిని తట్టుకుని గ్రౌండ్ లో చెలరేగిపోతారా? లేదా? అన్నది సందేహంగానే ఉంది.

ఛాంపియన్స్ ట్రీఫీ తర్వాత భారత్ - పాకిస్తాన్ జట్లు టీ 20 ఫార్మాట్ లో తొలి సారి తలపడుతున్నాయి. కానీ నాటి పరిస్థితులు వేరు. ఇప్పుడు పహాల్గామ్ దాడి, ఆపరేషన్ సింధూర్ వంటి పరిణామాలతో ఇరు జట్లు తలపడుతుండటంతో ప్రెజర్ ను ఎలా తట్టుకుంటరాన్నది మాత్రం చూడాలి. ఛాంపియన్స్ ట్రోఫీలో పాక్ ను మట్టికరిపించిన భారత్ ట్రాక్ రికార్డు చూస్తే టీ 20లోనూ ఆధిపత్యం కనిపిస్తుంది. పాక్ - భారత్ దేశాల మధ్య ఉద్రిక్తతలు కొనసాగుతున్న నేపథ్యంలో టీం ఇండియా ఎలా ఆడుతుందన్నది అందరిలోనూ కలుగుతున్న ప్రశ్న. గణాంకాలు చూస్తే భారత్ - పాకిస్తాన్ మధ్య పదమూడు టీ 20 మ్యాచ్ లు జరిగితే అందులో పది మ్యాచ్ లలో భారత్ గెలిచింది. మూడింటిలోనే పాక్ నెగ్గింది. మరి ఈ సారి ఏం జరుగుతుందోనన్నది చూడాలి.