బీఆర్‌ఎస్‌ నుంచి దూరమైన కవిత; ప్రజా సమస్యలపైనే దృష్టి

నిజామాబాద్‌కే పరిమితం చేశారని ఆరోపణ

బీఆర్‌ఎస్‌ పాలనలో ఉన్నప్పుడంతా ‘ప్రోటోకాల్‌’ పేరుతో నిజామాబాద్‌కే పరిమితం చేశారని కవిత వ్యాఖ్యానించారు. “ఆ పార్టీతో ఇప్పుడు నాకు సంబంధం లేదు. అధికారమంటే శాశ్వతం కాదు. అది శాశ్వతమని భావించినవాళ్లు ఇప్పుడు ఇంట్లో కూర్చున్నారు” అని ఆమె అన్నారు.

ప్రజా సమస్యలపైనే దృష్టి – ఎన్నికల సంవత్సరం రాజకీయ ప్రవేశం

తన సంస్థ తెలంగాణ జాగృతి ఇకపై ప్రజల సమస్యలు, అభివృద్ధి అంశాలపై కేంద్రీకరిస్తుందని కవిత చెప్పారు. “నేను పూర్తి స్థాయి రాజకీయాల్లోకి ఎన్నికల సంవత్సరం మాత్రమే వస్తాను. మహిళా నాయకులు కూడా రాజకీయాలను ఎలా నడిపించగలరో చూపిస్తాను” అని చెప్పారు. “తెలంగాణ అందరిదీ కావాలి. అసమానతలేని తెలంగాణ కావాలి. విద్య, ఆరోగ్యం పట్ల ప్రజలు నిశ్చింతగా ఉండే పరిస్థితి రావాలి” అని కవిత అన్నారు.

ఎంజీఎం ఆస్పత్రి నిర్మాణంలో అవకతవకలు ఆరోపణ

వరంగల్‌లో రూ.1,700 కోట్ల ఎంజీఎం ఆస్పత్రి నిర్మాణంలో అవకతవకలు జరిగాయని ఆమె ఆరోపించారు. “మొదట రూ.1,100 కోట్లకు అంచనా వేసిన పనిని పెంచి రూ.1,700 కోట్లకు కాంట్రాక్ట్‌ ఇచ్చారు. అది హరీష్‌రావుతో సంబంధం ఉన్న బెనామీ కంపెనీకి అప్పగించారు. విజిలెన్స్‌ విచారణ మొదలైందంటే రిపోర్టు ఎక్కడ? చర్యలు ఎందుకు తీసుకోవడం లేదు?” అని ప్రశ్నించారు.

పంట కొనుగోలులో నిర్లక్ష్యంపై విమర్శ

రైతుల పంట కొనుగోలు ఆలస్యం అవుతోందని కవిత విమర్శించారు. “1,306 కేంద్రాలు తెరవాలని ప్రకటించి ఇప్పటివరకు 630 మాత్రమే ప్రారంభించారు. 10 లక్షల మెట్రిక్‌ టన్నుల లక్ష్యంలో 17 వేల టన్నులు మాత్రమే కొనుగోలు చేశారు. వర్షాల్లో రైతుల ధాన్యం చెడిపోతోంది. ఇది ఏ మోసం?” అని ప్రశ్నించారు.

పట్టణాభివృద్ధి, విద్యార్థుల సంక్షేమంపై దృష్టి

స్మార్ట్‌ సిటీ పనులను సమీక్షించిన కవిత, “వరంగల్‌కు రూ.900 కోట్లు కేటాయించినా వాటిలో ఎక్కువ భాగం కొద్దిపాటి పనులకే మళ్లించారు” అని విమర్శించారు. భూగర్భ డ్రెయినేజ్‌, డంపింగ్‌ యార్డ్‌, కాకతీయ యూనివర్సిటీలో 1,100 మంది విద్యార్థినుల కోసం వసతి గృహాల నిర్మాణం తక్షణం పూర్తి చేయాలని కోరారు.

అలాగే ఎస్సీ, ఎస్టీ, బీసీ విద్యార్థులకు వివక్ష చూపుతున్న జీయోలను రద్దు చేయాలని, నియామక లోపాలను సరిదిద్దాలని, డీఎస్సీ ప్రక్రియను పునఃప్రారంభించాలని డిమాండ్‌ చేశారు. ఐదు జిల్లాల పర్యటన తర్వాత తెలంగాణ జాగృతి ‘చర్యల నివేదిక’ను విడుదల చేస్తామని తెలిపారు.