ఇరాన్ అత్యున్నత జాతీయ భద్రతా మండలి యుద్ధంలో రెండు వారాల కాల్పుల విరమణకు అంగీకరించినట్లు ప్రకటించింది. శుక్రవారం నుంచి ఇస్లామాబాద్లో అమెరికాతో చర్చలు చేపడతామని తెలిపింది. “ఇది యుద్ధం ముగిసిందని కాదు. శత్రువు స్వల్ప తప్పిదం చేసినా పూర్తి శక్తితో ప్రతిస్పందిస్తాం” అని ప్రకటనలో స్పష్టం చేసింది. అమెరికా అధ్యక్షుడు డొనాల్డ్ ట్రంప్ ఇరాన్పై దాడులను విస్తరించమన్న తన హెచ్చరికలను వెనక్కి తీసుకున్నారు. ఇరాన్ రెండు వారాల కాల్పుల విరమణకు సిద్ధంగా ఉండి హోర్ముజ్ జలసంధిని తెరిస్తే, వంతెనలు, విద్యుత్ కేంద్రాలు వంటి పౌర లక్ష్యాలపై దాడులు నిలిపేస్తామని చెప్పారు. మంగళవారం ట్రంప్ చేసిన “ఒక నాగరికత ఈ రాత్రే నశిస్తుంది” అనే వ్యాఖ్యలు తీవ్ర విమర్శలకు దారి తీశాయి. డెమోక్రాట్లు, ట్రంప్కు దూరమైన ‘మేక్ అమెరికా గ్రేట్ అగేన్’ వర్గం, అమెరికాకు చెందిన తొలి పోప్ సహా పలువురు ఖండించారు.
దాడులు కొనసాగుతున్నాయని...
ఇజ్రాయెల్ దాడులు కొనసాగుతున్నాయని ఒక సైనిక అధికారి వెల్లడించారు. అదే సమయంలో వైట్హౌస్ రెండు వారాల అమెరికా–ఇరాన్ కాల్పుల విరమణ ఒప్పందానికి ఇజ్రాయెల్ అంగీకరించిందని తెలిపింది. ఇరాన్ కూడా ఇజ్రాయెల్పై కాల్పులు కొనసాగించింది. లెబనాన్ తీర నగరం సిడోన్పై ఇజ్రాయెల్ దాడిలో కనీసం ఎనిమిది మంది మృతి చెందగా, 22 మంది గాయపడ్డారని అక్కడి ఆరోగ్య శాఖ తెలిపింది. హెజ్బొల్లాతో జరుగుతున్న తాజా యుద్ధంలో ఇప్పటివరకు 1,530 మంది మృతి చెందినట్లు సమాచారం. పాకిస్థాన్ ప్రధాని షెహబాజ్ షరీఫ్ ఇరాన్, అమెరికా ప్రతినిధులను శుక్రవారం ఇస్లామాబాద్కు ఆహ్వానించారు. రెండు దేశాలు కాల్పుల విరమణకు అంగీకరించాయని ఎక్స్లో పేర్కొన్నారు. ఇరాక్లో ఇరాన్ మద్దతు ఉన్న కటైబ్ హెజ్బొల్లా మిలీషియా అపహరించిన అమెరికన్ జర్నలిస్ట్ షెల్లీ కిట్టెల్సన్ విడుదలైనట్లు అమెరికా విదేశాంగ మంత్రి మార్కో రుబియో తెలిపారు.
హోర్ముజ్ జలసంధి నుంచి...
ట్రంప్ నిర్ణయించిన గడువు సమీపించగా చర్చల్లో అమెరికా ఉపాధ్యక్షుడు జేడీ వాన్స్ కూడా పాల్గొన్నట్లు వర్గాలు వెల్లడించాయి. చైనా అధికారులు కూడా ఇరాన్ను కాల్పుల విరమణ దిశగా ప్రోత్సహించినట్లు సమాచారం. పాకిస్థాన్, టర్కీ, ఈజిప్ట్ మధ్యవర్తిత్వంతో చైనా తన ప్రభావం వినియోగించినట్లు పేర్కొన్నారు. రెండు వారాల ప్రణాళికలో భాగంగా హోర్ముజ్ జలసంధి నుంచి వెళ్లే నౌకల నుంచి ఇరాన్, ఒమాన్ రుసుములు వసూలు చేసుకునే అవకాశం కల్పించారని ప్రాంతీయ అధికారి తెలిపారు. అమెరికా సైన్యం ఇరాన్పై దాడులను నిలిపివేసినట్లు ఒక అధికారి తెలిపారు. రక్షణ చర్యలు మాత్రం కొనసాగుతాయని చెప్పారు.ఇరాన్ ప్రతిపాదించిన 10 అంశాల శాంతి ప్రణాళికను “చర్చలకు అనుకూలమైన ఆధారం”గా ట్రంప్ అభివర్ణించారు. అయితే ఆ ప్రణాళిక వివరాలపై వైట్హౌస్ స్పష్టత ఇవ్వలేదు. యుద్ధం మధ్యలోనూ ఇజ్రాయెల్, యుఏఈలో క్షిపణి హెచ్చరికలు వినిపించాయి. హోర్ముజ్ జలసంధి గుండా నౌకలకు పరిమిత సమన్వయంతో ప్రయాణానికి అనుమతి ఉంటుందని ఇరాన్ విదేశాంగ మంత్రి తెలిపారు.