ఇరాన్ - ఇజ్రాయిల్ మధ్య యుద్ధం మరింత ముదిరింది. దక్షిణ ఇజ్రాయెల్లోని రెండు ప్రాంతాలపై శనివారం రాత్రి ఇరాన్ క్షిపణులు దాడి చేశాయి. ఈ దాడుల్లో పలు భవనాలు ధ్వంసమయ్యాయి. దాదాపు డజన్ల సంఖ్యలో ప్రజలు గాయపడ్డారు. దేశంలోని ప్రధాన అణు పరిశోధనా కేంద్రానికి సమీపంలోనే ఈ ఘటనలు చోటుచేసుకోవడం ఉద్రిక్తతను మరింత పెంచింది. ఇదే సమయంలో అమెరికా అధ్యక్షుడు డొనాల్డ్ ట్రంప్ హెచ్చరిక జారీ చేశారు. 48 గంటల్లో హోర్ముజ్ జలసంధిని పూర్తిగా తెరవకపోతే ఇరాన్ విద్యుత్ కేంద్రాలను ధ్వంసం చేస్తామని సోషల్ మీడియా ద్వారా ప్రకటించారు. “పెద్ద విద్యుత్ కేంద్రం నుంచి ప్రారంభిస్తాం” అని పేర్కొన్నారు.ఈ పరిణామాలు యుద్ధం నాల్గో వారంలోకి అడుగుపెట్టిన వేళ కొత్త మలుపు తిరిగిందనే సంకేతాలు ఇస్తున్నాయి.
హోర్ముజ్ జలసంధిపై ఒత్తిడి...
.ప్రపంచానికి చమురు సరఫరాలో కీలక మార్గంగా ఉన్న హోర్ముజ్ జలసంధి ప్రస్తుతం తీవ్ర ఉద్రిక్తతలో ఉంది. వాణిజ్య నౌకలపై దాడులు, మరిన్ని దాడుల బెదిరింపుల వల్ల ట్యాంకర్లు దాదాపు నిలిచిపోయాయి. చమురు, వాయువు రవాణా ఆగిపోవడంతో ఉత్పత్తి తగ్గించాల్సిన పరిస్థితి ఏర్పడింది. దీంతో అంతర్జాతీయ మార్కెట్లో ధరలు ఎగబాకుతున్నాయి.
డిమోనా, అరాద్లో దాడులు...
టెహ్రాన్లోని నాటాంజ్ అణు కేంద్రంపై ఉదయం దాడి జరిగిన కొద్దిసేపటికే ఇజ్రాయెల్పై ఈ క్షిపణి దాడులు జరిగాయి. డిమోనా, అరాద్ నగరాలపై పడిన క్షిపణులను అడ్డుకోవడంలో తమ వైమానిక రక్షణ వ్యవస్థ విఫలమైందని ఇజ్రాయెల్ సైన్యం తెలిపింది. అణు కేంద్రం సమీప ప్రాంతంలో ఈ రకమైన చొరబాటు ఇదే తొలిసారి. అరాద్లో నేరుగా తాకిన క్షిపణి కారణంగా కనీసం 10 అపార్ట్మెంట్ భవనాలు దెబ్బతిన్నాయి. వాటిలో మూడు తీవ్రంగా దెబ్బతిని కూలే ప్రమాదం ఉంది. కనీసం 64 మందిని ఆస్పత్రులకు తరలించారు. ఇజ్రాయెల్ ప్రధానమంత్రి బెంజమిన్ నెతన్యాహు “ఇది చాలా క్లిష్టమైన సాయంత్రం” అని వ్యాఖ్యానించారు. మరిన్ని అత్యవసర సిబ్బందిని ఘటనాస్థలానికి పంపిస్తున్నట్లు తెలిపారు.
యుద్ధం మరింత తీవ్రమవుతుందా?
“యుద్ధం త్వరలో ముగిసేలా లేదు” అని ఇజ్రాయెల్ సైన్యాధిపతి ఎయాల్ జమీర్ అన్నారు.ఇరాన్ పార్లమెంట్ స్పీకర్ మహమ్మద్ బఘేర్ ఘాలిబాఫ్ కూడా “డిమోనా వంటి రక్షణ గట్టిగా ఉన్న ప్రాంతంలో క్షిపణులను అడ్డుకోలేకపోవడం యుద్ధం కొత్త దశలోకి వెళ్లిన సూచన” అని వ్యాఖ్యానించారు. ఇండియన్ ఓషన్లో ఉన్న యుకే–అమెరికా సంయుక్త సైనిక స్థావరం డియేగో గార్సియాపై కూడా ఇరాన్ దాడి ప్రయత్నించింది. ఈ దాడి విఫలమైంది. అయితే ఇరాన్ క్షిపణుల పరిధి గత అంచనాల కంటే ఎక్కువగా ఉందనే అనుమానాలు వ్యక్తమవుతున్నాయి.అమెరికా సెంట్రల్ కమాండ్ అధికారి బ్రాడ్ కూపర్ ఇరాన్ సముద్ర మార్గాలపై దాడి చేసే సామర్థ్యం తగ్గిందని చెప్పారు. అయినా ప్రాంతీయ ఉద్రిక్తత కొనసాగుతోంది.
గల్ఫ్ దేశాల్లో ఉద్రిక్తత...
దుబాయ్లో క్షిపణి హెచ్చరికలు వినిపించాయి. సౌదీ అరేబియా తూర్పు ప్రాంతంలో 20 డ్రోన్లను కూల్చినట్లు తెలిపింది. గల్ఫ్ దేశాల్లో కూడా పరిస్థితి ఉద్రిక్తంగా మారింది. ఈ యుద్ధంలో ఇరాన్లో మరణాల సంఖ్య 1500 దాటింది. ఇజ్రాయెల్లో 15 మంది మృతి చెందగా, వెస్ట్ బ్యాంక్లో మరో నలుగురు ప్రాణాలు కోల్పోయారు. అమెరికా సైన్యంలో 13 మంది సిబ్బంది మృతి చెందినట్లు సమాచారం.
లెబనాన్లో ఘర్షణలు...
దక్షిణ లెబనాన్లో ఇజ్రాయెల్ సైన్యం లక్ష్యిత భూసేన చర్యలు చేపట్టింది. కనీసం నలుగురు మిలిటెంట్లు మృతి చెందారు. హిజ్బుల్లా బలగాలు కూడా ప్రతిఘటించాయి.లెబనాన్లో ఇజ్రాయెల్ దాడుల్లో వెయ్యి మందికిపైగా మృతి చెందగా, లక్షల మంది నిరాశ్రయులయ్యారు.