అమెరికా అధికారులు కీలక నిర్ణయం ప్రకటించారు. చమురు ధరలు పెరుగుతున్న నేపథ్యంలో, సముద్రంలో నిలిచిపోయిన ఇరాన్ చమురుపై ఉన్న ఆంక్షలను నెలరోజుల పాటు సడలించనున్నారు. ఈ నిర్ణయం ప్రకారం శుక్రవారం నాటికి నౌకల్లో లోడ్ చేసిన ఇరాన్ చమురుకు ఈ సడలింపు వర్తిస్తుంది. ఇది ఏప్రిల్ 19 వరకు అమల్లో ఉంటుంది. అదే రోజు ఇరాన్ ప్రపంచవ్యాప్తంగా వినోద, పర్యాటక కేంద్రాలపై ప్రతీకార దాడులు విస్తరిస్తామని హెచ్చరించింది. దీనికి ప్రతిగా అమెరికా మరిన్ని యుద్ధ నౌకలు, మెరైన్స్ను ఆ ప్రాంతానికి పంపుతున్నట్లు ప్రకటించింది.కొద్ది గంటల తర్వాత అధ్యక్షుడు డొనాల్డ్ ట్రంప్ సోషల్ మీడియాలో మరో ప్రకటన చేశారు. తమ ప్రభుత్వం ప్రాంతంలో సైనిక చర్యలను తగ్గించే దిశగా ఆలోచిస్తున్నట్లు తెలిపారు. చమురు ధరలు మళ్లీ పెరగడంతో అమెరికా స్టాక్ మార్కెట్ పడిపోవడం ఈ ప్రకటనకు కారణంగా కనిపిస్తోంది.
యుద్ధం తగ్గే సూచనలు...
ఇలా పరస్పర విభిన్న సంకేతాలు వస్తున్నప్పటికీ యుద్ధం తగ్గే సూచనలు కనిపించడం లేదు. ఇరాన్ ఇజ్రాయెల్పైనా, పక్కనే ఉన్న గల్ఫ్ అరబ్ దేశాల శక్తి కేంద్రాలపైనా దాడులు కొనసాగిస్తోంది. ఇదే సమయంలో ముస్లింలకు అత్యంత పవిత్రమైన రోజులలో ఒకటి కొనసాగుతోంది. మరోవైపు ఇరాన్లో నవరోజ్ పండుగ వేడుకలు జరుగుతుండగానే టెహ్రాన్పై ఇజ్రాయెల్ వైమానిక దాడులు జరిగాయి. ఇరాన్ నుంచి స్పష్టమైన సమాచారం బయటకు రావడం లేదు. అమెరికా, ఇజ్రాయెల్ దాడుల్లో అక్కడి ఆయుధ, అణు, ఇంధన కేంద్రాలకు ఎంత నష్టం జరిగిందో ఇంకా తెలియడం లేదు. ఫిబ్రవరి 28 నుంచి ఈ దాడులు కొనసాగుతున్నాయి. దేశంలో నిజంగా ఎవరి చేతిలో అధికారం ఉందన్నదీ స్పష్టంగా తెలియని పరిస్థితి ఉంది.
ఆహారం..ఇంధన ధరల ప్రభావం...
ఇరాన్ దాడుల ప్రభావంతో చమురు సరఫరాలు దెబ్బతింటున్నాయి. దాంతో మధ్యప్రాచ్యం దాటి ఇతర ప్రాంతాల్లో కూడా ఆహారం, ఇంధన ధరలు పెరుగుతున్నాయి. ఈ యుద్ధానికి అమెరికా, ఇజ్రాయెల్ వేర్వేరు కారణాలు చెబుతున్నాయి. ఇరాన్ ప్రభుత్వాన్ని కూల్చేందుకు ప్రజల్లో తిరుగుబాటు రగల్చాలని ఒకవైపు భావిస్తుండగా, మరోవైపు అణు, క్షిపణి కార్యక్రమాలను పూర్తిగా నిలిపివేయాలని చెబుతున్నాయి. అయితే ఇప్పటివరకు అలాంటి తిరుగుబాటు సంకేతాలు కనిపించలేదు. యుద్ధం ఎప్పుడు ముగుస్తుందన్నదీ స్పష్టత లేదు.