Shiva Balakrishna : విల్లాలు.. కిలోల కొద్దీ బంగారం.. వెండి.. ఖరీదైన వాచ్‌లు ఒక్క అధికారి.. ఇన్ని కోట్ల ఆస్తులా?

అలా అడ్డగోలుగా సంపాదించేశాడు మరి. అక్రమంగా ఆస్తులు కూడేసి మరీ కుటుంబ సభ్యులు, బంధువుల పేరిట ఉంచాడు. ఏసీబీ అధికారులు దాదాపు 70 ప్రాంతాల్లో సోదాలు నిర్వహించారు. ఇక నగదు అంటారా? దానిని లెక్కపెట్టేందుకు కౌంటింగ్ మెషీన్లు తేవాల్సి వచ్చింది. నలభై లక్షల రూపాయల వరకూ ఆయన ఇంట్లోనే నగదు లభ్యమయినట్లు ఏసీబీ అధికారులు తెలిపారు. మణికొండలో అతి ఖరీదైన విల్లాతో పాటు, నానక్ రూమ్ గూడలో మరొక విల్లా ఉన్నట్లు గుర్తించారు. అయితే సోదాలకు శివబాలకృష్ణ సభ్యులు ఏ మాత్రం సహకరించలేదని ఏసీబీ అధికారులు తెలిపారు.

ఈరోజు బ్యాంకు లాకర్లను కూడా తెరవనున్నారు. మరి లాకర్లలో మనోడు ఎంత దాచి పెట్టాడో బయటపడుతుంది. హెచ్‌ఎండీఏ డైరెక్టర్ గా ఉన్నప్పుడు రియల్ ఎస్టేట్ సంస్థలకు అడ్డగోలు అనుమతులు ఇచ్చి కోట్లాది రూపాయలు కూడబెట్టిన శివబాలకృష్ణ ఆదాయానికి మించిన ఆస్తులు సంపాదించాడన్న సమాచారంతోనే ఏసీబీ అధికారులు దాడులు చేశారు. ఈ దాడుల్లో నివ్వెరపోయే నిజాలు బయటపడ్డాయి. ఆయనను అరెస్ట్ చేశారు. ఏసీబీ అధికారులు విచారిస్తున్నారు. నేడో, రేపో ఆయనను కోర్టులో హాజరుపర్చే అవకాశాలున్నాయి.