నేటి నుంచి హైదరాబాద్ లో ఇంటర్నేషనల్ కైట్ ఫెస్టివల్

తెలంగాణ టూరిజం శాఖ ఆధ్వర్యంలో జనవరి 13 నుంచి 15 వరకు ఈ పండుగ సాగనుంది. సంప్రదాయ క్రీడలు, వంటకాల వారసత్వం, సాంస్కృతిక ప్రదర్శనలు ప్రధాన ఆకర్షణగా ఉండనున్నాయి. 19 దేశాల నుంచి 40 మంది అంతర్జాతీయ గాలిపటాల కళాకారులు, దేశవ్యాప్తంగా 15 రాష్ట్రాల నుంచి 55 మంది గాలిపటాల కళాకారులు పాల్గొననున్నారు. భారీగా, ప్రత్యేక డిజైన్లతో తయారైన గాలిపటాలు, రాత్రివేళ గాలిపటాల ప్రదర్శనలు సందర్శకులను ఆకట్టుకోనున్నాయి.

పతంగుల పండుగతో పాటు ‘కల్చర్ లాంగ్వేజ్ ఇండియన్ కనెక్షన్స్’ సహకారంతో మిఠాయిల పండుగ నిర్వహించనున్నారు. ఫుడ్ కోర్టులో 60 స్టాళ్లలో పంజాబ్, గుజరాత్, పశ్చిమ బెంగాల్, కేరళ, మహారాష్ట్ర తదితర రాష్ట్రాల మహిళలు ఇంట్లో తయారైన సంప్రదాయ వంటకాలను ప్రదర్శించి విక్రయించనున్నారు. స్థానిక కళాకారులకు తోడ్పాటు అందించేలా చేనేత–హస్తకళల కోసం మరో 100 స్టాళ్లు కేటాయించారు.