Tirumala : తిరుమలకు వచ్చే భక్తులకు హై అలెర్ట్.. అలిపిరి టోల్ గేట్ నుంచే?

తిరుమలలో భక్తుల రద్దీ నెలకొన్నప్పటికీ వైకుంఠ ఏకాదశికి భారీగా ఏర్పాట్లు టీటీడీ చేస్తుంది. ఈ నెల 30వ తేదీన ముక్కోటి ఏకాదశి సందర్భంగా ఆలయాన్ని టీటీడీ ప్రత్యేకంగా అలంకరిస్తోంది. ఏకాదశి నుంచి పది రోజులు వైకుంఠ ద్వారం నుంచి వేంకటేశ్వర స్వామిని భక్తులు దర్శించుకునేందుకు అన్ని ఏర్పాట్లు చేస్తోంది. వరస సెలవులు రావడంతో పాటు నూతన సంవత్సరం శ్రీవారిని దర్శించుకుంటే మంచిదని భావించి ఎక్కువ మంది భక్తుల తిరుమలకు చేరుకుంటున్నారని తిరుమల తిరుపతి దేవస్థానం అధికారులు వెల్లడించారు.

ఈరోజు తిరుమలలోని వైకుంఠం క్యూ కాంప్లెక్స్ లోని కంపార్ట్ మెంట్లు అన్ని భక్తులతో నిండిపోయాయి. నారాయణగిరి షెడ్లు కూడా భక్తులతో నిండిపోయింది. శిలాతోరణం వరకూ క్యూ లైన్ లో భక్తులు బారులు తీరారు. సర్వ దర్శనం క్యూ లైన్ లోకి నేడు టోకెన్లు లేకుండా ప్రవేశించే భక్తులకు శ్రీవారి దర్శనం ఇరవై గంటలకు పైగానే సమయం పడుతుందని తిరుమల తిరుపతి దేవస్థానం అధికారులు వెల్లడించారు. టైమ్ స్లాట్ దర్శనం భక్తులకు ఆరు గంటలకుపైగానే సమయం పడుతుంది. మూడు వందల రూపాయల ప్రత్యేక దర్శనం టిక్కెట్లను కొనుగోలు చేసిన భక్తులకు శ్రీవారి దర్శనం నాలుగు గంటలకు పైగానే సమయం పడుతుంది. నిన్న తిరుమల శ్రీవారిని 72,487 మంది భక్తులు దర్శించుకున్నారు. వీరిలో 29,500 మంది భక్తులు తమ తలనీలాలను సమర్పించుకుని మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 4.52 కోట్ల రూపాయలు వచ్చిందని అధికారులు తెలిపారు.