Tirumala : తిరుమలలో రికార్డు స్థాయిలో భక్తులు.. స్వామి దర్శనానికి?

నేడు పౌర్ణమి గరుడ వాహన సేవను కూడా తిరుమల దేవస్థానం అధికారులు రద్దు చేశారు. తిరుమలకు రికార్డు స్థాయిలో భక్తులు చేరుకోవడంతో అందరికీ దర్శనం కల్పించేందుకు తిరుమల తిరుపతి దేవస్థానం అధికారులు ఏర్పాట్లు చేశారు. రోజు వారీ దర్శనం చేసుకునే వారికంటే నిన్న అదనంగా పదిహేను వేల మందికి దర్శనాన్ని అధికారులు కల్పించారు. తిరుమల మాడ వీధులు గోవింద నామస్మరణలతో మారుమోగిపోతున్నాయి. వసతి గృహాలు దొరకడం కూడా భక్తులకు కష్టంగా మారింది.

ఈరోజు తిరుమలలోని వైకుంఠం క్యూ కాంప్లెక్స్ లోని అన్ని కంపార్ట్ మెంట్లు భక్తులతో నిండిపోయాయి. బయట శిలాతోరణం వరకూ భక్తుల క్యూ లైన్ విస్తరించింది. సర్వదర్శనం క్యూ లైన్ లోకి ప్రవేశించిన భక్తులకు శ్రీవారి దర్శనం ఇరవై గంటల సమయం పడుతుందని తిరుమల తిరుపతి దేవస్థానం అధికారులు వెల్లడించారు. నిన్న తిరుమల శ్రీవారిని 83,032 మంది భక్తులు దర్శించుకున్నారు. వీరిలో 27,372 మంది భక్తులు తమ తలనీలాలను సమర్పించుకుని మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 4.10 కోట్ల రూపాయలు వచ్చిందని అధికారులు వెల్లడించారు.