అరుంధతి సినిమాను 25 సార్లకు పైగా చూసి.. ఆత్మహత్య

ఈ ఘటన కర్ణాటక రాష్ట్రంలో చోటు చేసుకుంది. తుమకూరు జిల్లా మధుగిరి సమీపంలోని ఓ గ్రామంలో చోటుచేసుకుంది. మధుగిరి సమీపంలో ఒక గ్రామానికి చెందిన రేణుకా ప్రసాద్‌ (23) ఇంటర్మీడియట్‌ పరీక్షల్లో ఫెయిల్‌ అయ్యాడు. తన గ్రామంలోనే ఖాళీగా ఉండేవాడు. బయటకు వెళ్లే వాడు కాదు.. ఇంట్లోనే ఉంటూ చాలా ఏళ్ల క్రితం విడుదలైన ఓ తెలుగు సినిమాను 25 సార్లు చూశాడు. అందులో ఉన్నది ఉన్నట్లుగానే తన జీవితంలో కూడా జరుగుతుందని భావించాడు. తన గ్రామశివార్లలో 20 లీటర్ల పెట్రోలును ఒంటిపై పోసుకుని ప్రాణత్యాగం చేసి మోక్షం పొందుతున్నానని చెబుతూ సెల్‌ఫోన్‌లో సెల్ఫీవీడియో తీసుకున్నాడు. తన తండ్రికి పంపించి తరువాత నిప్పంటించుకున్నాడు. ఈ విషయాన్ని గమనించిన స్థానికులు వెంటనే యువకుడిని రక్షించి బెంగళూరులోని విక్టోరియా ఆసుపత్రిలో చేర్పించారు. ఆసుపత్రిలో చికిత్స పొందుతూ రేణుకా ప్రసాద్‌ మరణించినట్లు వైద్యులు తెలిపారు.

విక్టోరియా ఆసుపత్రిలో 60 శాతం కాలిన గాయాలతో మృతి చెందాడు. "అతను సినిమాలకు, ముఖ్యంగా అరుంధతి సినిమాకు బానిసయ్యాడు. అతను సినిమాలోని పాత్రలను అనుకరించేవాడు. అతను ఫస్ట్ పీయూలో ఫెయిల్ అయిన తర్వాత, అతను పల్లెటూరికి వచ్చి ఖాళీగా ఉన్నాడు. అతను 'అరుంధతి' సినిమాని చాలాసార్లు చూశాడు," అని రేణుకా ప్రసాద్ బంధువు రాజు అన్నారు. కొడిగెనహళ్లి పోలీసులు ఎఫ్‌ఐఆర్‌ నమోదు చేసి కేసు దర్యాప్తు చేస్తున్నారు. ఇంత పెద్ద మొత్తంలో పెట్రోలు ఎలా తెచ్చుకున్నాడన్న కోణంలో కూడా పోలీసులు ఆరా తీస్తున్నారు.