Gold Rates Today : బంగారం ధరలకు ఇక కళ్లెం వేయలేరేమో.. ఇలా పరుగులు తీస్తే ఎలా?

బంగారం ధరలు మరింత పెరగడానికి అనేక కారణాలు కనిపిస్తున్నా కొనుగోలు దారులకు అందుబాటులో లేకపోతే దాని ప్రభావం సేల్స్ పై పడుతుంది. క్రయవిక్రయాలు తగ్గుతాయని అందరూ ఊహించినట్లే జరుగుతుంది. ఇప్పటికే పది గ్రాముల బంగారం ధర 86 వేల రూపాయలు దాటేసింది. కిలో వెండి లక్షా ఏడు వేల రూపాయలకు చేరుకుంది. పెళ్లిళ్ల సీజన్ ప్రారంభం కావడంతో కొనుగోళ్లు ఎక్కువగా ఉంటాయని భావించినా ధరలను చూసి బంగారాన్ని కొనుగోలు చేసేందుకు జంకుతున్నారు. ఇక పుట్టినరోజులు, శుభకార్యాలకు ఖచ్చితంగా కొనుగోలు చేయాల్సిన వారు కూడా తమ ఆలోచనను విరమించుకుని మరొకటి కొనుగోలు చేస్తుండటంతో బంగారం కొనుగోళ్లు తగ్గుముఖం పట్టాయి.

ఇక పెట్టుబడి దారులు కూడా సంకోచిస్తున్నారు. బంగారంపై పెట్టుబడి సురక్షితమైనదని అందరూ అనుకుంటున్నా ఇంత పెద్దమొత్తంలో వ్యయం చేస్తే రేపు ఉన్నట్లుండి ధరలు పడిపోతే ఎలా అని సందిగ్దంలో పడ్డారు. అయితే ధరలు తగ్గే అవకాశం లేదని, పెట్టుబడిదారులు ముందుకు రావాలని మార్కెట్ నిపుణులు కోరుతున్నారు. ఈరోజు కూడా దేశంలో బంగారం ధరలు పెరిగాయి. వెండి ధరలు స్వల్పంగా తగ్గాయి. ఉదయం ఆరు గంటలకు హైదరాబాద్ బులియన్ మార్కెట్ లో బంగారం, వెండి ధరలు ఇలా ఉన్నాయి. 22 క్యారెట్ల పది గ్రాముల బంగారం ధర 79.310 రూపాయలకు చేరుకుంది. 24 క్యారెట్ల పది గ్రాముల బంగారం ధర 86,520 రూపాయలుగా ఉంది. కిలో వెండి ధర 1.06, 900 పలుకుతుంది.