Andhra Pradesh : ఆది అసలు బాధ అదేనటగా? ఓపెన్ అయింది అందుకేనట

కడప జిల్లా రాజకీయాల్లో జమ్మలమడుగు ఎమ్మెల్యే ఆదినారాయణ రెడ్డి చేసిన వ్యాఖ్యలు కూటమిలోని ప్రధాన నేతలను ఉద్దేశించి చేసినవేనని అర్థమవుతుంది. జమ్మలమడుగు ఒకప్పుడు వర్గపోరుకు కేంద్రం. ఇప్పుడు అదే నియోజకవర్గంలో ఎమ్మెల్యే ఆదినారాయణరెడ్డి తీరు రాష్ట్ర వ్యాప్తంగా చర్చనీయాంశమవుతోంది.కూటమి ప్రభుత్వం అధికారంలో ఉన్నప్పటికీ, సొంత నియోజకవర్గంలో ఆయన ఒంటరి పోరాటం చేస్తున్నారనే భావన ఈ మధ్య ఆయన మాటల్లో వ్యక్తమవుతోంది. అందుకే పనులు కాకుంటే తన పదవికి రాజీనామా చేస్తానని అంటున్నారు.సొంత నియోజకవర్గంలో పట్టు కోసం ఆరాటమే ఆదినారాయణరెడ్డిని ఈ వ్యాఖ్యలను చేసినట్లుందని అంటున్నారు. జమ్మలమడుగు నియోజకవర్గంలోఅదానీ గ్రూప్ చేపట్టిన పంప్డ్ స్టోరేజ్ ప్రాజెక్ట్ విషయంలో దక్కిన కాంట్రాక్టు పనుల్లో సబ్ కాంట్రాక్టులు ఇవ్వాలని గతంలోనూ ఆది అనుచరులు హల్ చల్ చేశారు. బీజేపీ ఎంపీ సీఎం రమేష్ కు ఆ పనులు దక్కడంతో ఆదినారాయణరెడ్డి ఉడికిపోతున్నారని తెలిసింది. తన నియోజకవర్గంలో వారి పెత్తనమేంటన్న అభిప్రాయంతోనే ఆయన ఆగ్రహావేశానికి గురవుతున్నట్లు తెలిసింది. జమ్మలమడుగులో ఆదినారాయణరెడ్డికి ఉన్న అతిపెద్ద సమస్య నియోజకవర్గంలో ఆధిపత్యం.