Amaravathi : అమరావతిలో స్టార్ హోటల్ నిర్మాణానికి అనుమతి

పర్యాటక రంగ అభివృద్ధి మాత్రమే కాకుండా, హోటల్ నిర్మాణం చుట్టుపక్కల వ్యాపారాలకు కూడా ప్రోత్సాహం లభించనుంది. ఇది అమరావతిని అంతర్జాతీయ స్థాయి టూరిజం సెంటర్‌గా తీర్చిదిద్దడంలో కీలక పాత్ర పోషించనుందన్న అభిప్రాయం వ్యక్తమవుతుంది. ప్రభుత్వం ఈ ప్రాజెక్టుకు అనేక ఆర్థిక రాయితీలను ప్రకటించింది. పది సంవత్సరాల పాటు రాష్ట్ర పన్నులు మరియు స్టాంప్ డ్యూటీని పూర్తిగా తిరిగి చెల్లించేలా నిర్ణయం తీసుకుంది. అలాగే పరిశ్రమల తరహాలో విద్యుత్ చార్జీలు అమలు చేయడంతో పాటు, ఐదేళ్లపాటు విద్యుత్ సుంకాన్ని రీఫండ్ చేయనుంది. ఈ రాయితీలు రాష్ట్రంలో ప్రైవేట్ పెట్టుబడులను ఆకర్షించే దిశగా అడుగులు పడననున్నాయని తెలిపారు.

పర్యాటకరంగం పాలసీ 2024–2029 ప్రకారం పలు ప్రోత్సాహకాలు ఇచ్చేలా పర్యాటక శాఖ ప్రత్యేక ప్రధాన కార్యదర్శి అజయ్ జైన్ ఈ మేరకు ఉత్తర్వులు జారీ చేశారు. ఈ విధానం ప్రకారం హోటల్ రంగం, రిసార్టులు, మరియు పర్యాటక ప్రాజెక్టులకు పన్ను రాయితీలు, భూమి సబ్సిడీలు అందించనున్నట్లు స్పష్టం చేశారు. ప్రభుత్వం టూరిజం మౌలిక సదుపాయాలను బలోపేతం చేయడంపై దృష్టి సారించింది. ఈ నిర్ణయంతో అమరావతి పర్యాటక కేంద్రంగా మారే అవకాశాలు మరింత పెరిగాయి. మరిన్ని స్టార్ హోటళ్లు అమరావతి ప్రాంతంలో వచ్చే అవకాశముందని అధికారులు అభిప్రాయపడుతున్నారు.