Amaravathi : అమరావతికి భూసమీకరణ ఇంకా ముగియలేదట..సశేషం

ల్యాండ్ పూలింగ్ కు ముందుకు వచ్చేలా రాజధాని రైతులను ఒప్పించడం సాధ్యాసాధ్యాలపైనే ఇప్పుడు అధికారులు మల్లగుల్లాలు పడుతున్నారు. అలాగే మొదటి దశలో 34 వేల ఎకరాలను రైతుల నుంచి ప్రభుత్వం ల్యాండ్ పూలింగ్ ద్వారా భూమిని సేకరించింది. ఇప్పుడు మరో పదహారు వేలు సేకరిస్తే, ప్రభుత్వ భూమితో కలిపి మొత్తం 70 వేల ఎకరాల్లో నూతన రాజధాని అమరావతిని నిర్మించాలని చంద్రబాబు ప్రభుత్వం భావిస్తుంది. ఈ మేరకు త్వరలో నోటిఫికేషన్ విడుదల కానుంది. రైతులకు అవగాహన కల్పించేలా ప్రజాప్రతినిధులు ప్రయత్నించనున్నారు. రెండో దశలో 16,600 ఎకరాల ల్యాండ్ పూలింగ్ తర్వాత మరికొంత భూమిని కూడా సేకరించనున్నామని మంత్రి పొంగూరు నారాయణ చెప్పడం విశేషం. మొత్తం 16,666.5 ఎకరాల భూసమీకరణకు ఏడు 7 గ్రామాల పరిధిని ఎంచుకుంది. వైకుంఠపురం, పెడమద్దూరు, ఎండ్రాయి, కర్లపూడి, వడ్లమాను, హరిశ్చంద్రపురం, పెదపరిమి నుంచి సేకరించనున్నారు.

ఇప్పటి వరకూ 34 వేల ఎకరాల్లో రాజధాని అమరావతిని నిర్మించాలని భావించినా అందులో కేవలం 700 ఎకరాలు మాత్రమే ప్రభుత్వం వద్ద మిగిలాయి.అనేక సంస్థలకు, పరిశ్రమలకు, కేంద్ర ప్రభుత్వ సంస్థలకు, రాష్ట్ర కార్యాలయాలకు భూముల పంపిణీ జరిగింది. కమర్షియల్, రెసిడెన్షియల్ ప్లాట్లు కింద కొందరు భూములిచ్చిన రైతులకు ప్లాట్లు కేటాయించారు. అంతర్జాతీయ ఎయిర్ పోర్టును ఐదు వేల ఎకరాల్లో నిర్మించాలని చంద్రబాబు నిర్ణయించారు. ఇంకా రైల్వే స్టేషన్ కూడా అత్యాధునిక వసతులతో నిర్మించాలని భావిస్తున్నారు. దీంతో రాజధాని అమరావతి కోసం భూ సమీకరణ ఇప్పట్లో ఆగేలా కనిపించడం లేదు. దీంతో కొందరు రైతులు రాజధాని పరిసర ప్రాంతాల్లో ఆందోళన వ్యక్తం చేస్తున్నారు. ఇప్పటికే కొందరు విక్రయించుకోగా, మరికొందరు తమ వారసుల భవిష్యత్ కోసం ఉంచుకున్నారు. ఇప్పుడు ఆభూముల ఈ ల్యాండ్ పూలింగ్ ద్వారా వెళ్లే అవకాశాలు కనిపిస్తున్నాయి.